ოცნების დეპუტატი თენგიზ შარმანაშვილი ექსპრემიერ ირაკლი ღარიბაშვილის მე-6 წერილს ეხმაურება. მისი შეფასებით, ირაკლი ღარიბაშვილი თავისი ქმედებებით ოპოზიციის წისქვილზე ასხამს წყალს.

"თუ ვინმემ ხმაურიანად მხარი დაუჭირა, იშვიათი გამონაკლისის გარდა, არიან კოლექტიური "ნაციონალური მოძრაობის" წარმომადგენლები. გარდა იმ ზოგადი განცხადებისა, რომ "მთელმა საქართველომ იცის, წყალი და ზეთი რომ ვერ შეერევა, ისე არ შევერევი მაგათ", ეს კარგია სათქმელად, მაგრამ ფაქტი ერთია, რომ ერთი მიმართულებით მოძრაობენ და ისინი უწონებენ, რა კარგად ურტყამ ხელისუფლებას და ამისთვის მადლობასაც ეუბნებიან. სააკაშვილიც კი.

ასე რომ, თავის თავში ჩაიხედოს და ვის წისქვილზე ასხამს წყალს, იქიდან გამომდინარე მიხვდება ყველაფერს, თუ უკვე მიხვედრილი არ არის და ისე არ აკეთებს შეგნებულად", — განაცხადა შარმანაშვილმა პირველ არხთან საუბრისას.

შეგახსენებთ, რომ 7 სექტემბერს ექსპრემიერმა, ირაკლი ღარიბაშვილმა ციხიდან მე-6 წერილი გამოაქვეყნა, სადაც ხელისუფლებას მიმართავს: "ტყუილად ნუ წვალობთ! როგორც წყალი და ზეთი არ შეერევა ერთმანეთს, ისევე შეუძლებელია ჩემი და ნაციონალური მოძრაობის ერთმანეთთან დაკავშირება!"