რუსეთთან უვიზო მიმოსვლის აღდგენის შემდეგ, არა მხოლოდ რუსი ტურისტების ნაკადმა იმატა საქართველოში, საქართველოს მოქალაქეებშიც გაიზარდა მოსკოვის, სანქტ-პეტერბურგისა და ერმიტაჟის ნახვის მსურველთა რიცხვი. საზოგადოების ერთ ნაწილში რუსეთისადმი არამეგობრული და მტრული განწყობის მიუხედავად, ქართულმა ტურ-ოპერატორებმა რუსეთში ტურების დაგეგმვა დაიწყეს. როგორც NEWS.On.ge-სთან ტურისტული სააგენტო თრეველერის წარმომადგენელი, შალვა ბოლოთაშვილი ამბობს, რუსეთის ტურებზე დაინტერესება და მოთხოვნა დიდია, დღეს დადეს საშობაო ტური "მოსკოვი — პიტერი" და ბევრი ადგილი გაიყიდა.

"დაინტერესება ძალიან მაღალია. დღეს დავდეთ ტური და გაიყიდა უკვე ბევრი ადგილი. რაც უვიზო გაკეთდა, დავდივართ [რუსეთში], სერგეი რადონეჟელის და სერაფიმ საროველის ლავრასთან ერთად გვაქვს მომლოცველების პილიგრიმული ტური, ასევე ტურები პეტერბურგსა და მოსკოვში.

დაინტერესება სეზონურია, ზამთარი ცივია, ნაკლებად აქტუალურია, ზაფხულში მეტია მოთხოვნა", — განაცხადა შალვა ბოლოთაშვილმა.

"მოსკოვი - პიტერის" ტურის დეტალები Facebook-ში.

"მოსკოვი - პიტერის" ტურის დეტალები Facebook-ში.

ფოტო: შალვა ბოლოთაშვილი/"თრეველერი"

ჩვენს კითხვაზე, რა ასაკის ტურისტები ინტერესდებიან რუსეთში ტურებით, შალვა ბოლოთაშვილმა გვიპასუხა, რომ ახალგაზრდებიც და შუახნის მოქალაქეებიც ერთნაირად ინტერესდებიან რუსეთში მოგზაურობით. თრეველერში ისიც გვითხრეს, რომ მათი ტურები გათვლილია ქართველებზე და არა პოსტსაბჭოთა ქვეყნების ტურისტებზე.

რაც შეეხება ფასს, შალვა ბოლოთაშვილის თქმით, ფასი ცვალებადია. "მოსკოვი-პიტერის" 9-დღიან საშობაო ტურზე საშუალო ფასი 1200 ლარია.

შეგახსენებთ, რომ რუსეთ-საქართველოს შორის უვიზო მიმოსვლა გასული წლის 15 მაისს მოიხსნა. 2023 წლის 10 მაისს ვლადიმირ პუტინმა 2 განკარგულება გამოსცა - გააუქმა საქართველოს მოქალაქეებისთვის 2000 წლიდან ცალმხრივად მოქმედი სავიზო რეჟიმი და მოხსნა 2019 წლიდან დაწესებული აკრძალვა ორ ქვეყანას შორის პირდაპირ ფრენებზე.

მოსკოვი-თბილისი-მოსკოვის პირველი ავიარეისები 2023 წლის 9 მაისს, საპროტესტო აქციების ფონზე, რუსულმა ავიაკომპანია „აზიმუტმა“ შეასრულა.