რომის პაპმა ირანსა და ისრაელს მოუწოდა, "გონიერება გამოიჩინონ". მას შემდეგ, რაც ორი ქვეყნის მიერ განხორციელებულმა საჰაერო დარტყმებმა ათეულობით ადამიანი იმსხვერპლა და მოსახლეობა თავშესაფრებში იძულებით გადაიყვანეს, პაპმა ქვეყნებს დიალოგისკენ მოუწოდა.

"ასეთი სიფრთხილისა და დაძაბულობის ფონზე, მსურს, კიდევ ერთხელ მოვუწოდო მხარეებს პასუხისმგებლობისკენ და გონიერებისკენ...უსაფრთხო სამყაროს შექმნის საქმეს, სადაც ბირთვული საფრთხე აღარ იარსებებს, უნდა ვემსახუროთ ურთიერთპატივისცემით, გულწრფელი დიალოგითა და მშვიდობისკენ მიმართული ძალისხმევით – მშვიდობისა, რომელიც დამყარებულია სამართლიანობაზე, ძმობაზე და საერთო კეთილდღეობაზე...ყველა ქვეყნის ვალია, მხარი დაუჭიროს მშვიდობის საქმეს, შეუწყოს ხელი შერიგების პროცესს და მოიძიოს ისეთი გადაწყვეტილებები, რომლებიც უსაფრთხოებასა და ღირსებას უზრუნველყოფს ყველასთვის",— თქვა რომის პაპმა.

ცნობისთვის, ისრაელმა პარასკევს დილით ირანზე მასშტაბური იერიში მიიტანა, რასაც "პრევენციული დარტყმა" უწოდა. იერიში მიზნად ისახავდა ირანის ბირთვული პროგრამის შეჩერებას. ირანმა, რომელიც უარყოფს საიდუმლო ბირთვული იარაღის შექმნის პროგრამის ქონას, საპასუხოდ ისრაელის მიმართულებით რაკეტები გაუშვა.