ქართული ოცნების დეპუტატმა დღევანდელ პარლამენტის პლენარულ სხდომაზე აქტივისტების წინააღმდეგ სარჩელი შეტანის მოტივებზე ისაუბრა.

"17 მაისს, როცა პატრიარქის კურთხევით, საზოგადოების უდიდესი ნაწილი ოჯახის სიწმინდისა და მშობლების პატივისცემის დღეს აღნიშნავდა, რადიკალი აქტივისტები, კოორდინირებულად, ჩემს მცირეწლოვან შვილებთან და დედასთან ერთად თავს დაგვესხნენ.

მათი მოქმედება ბავშვთა უფლებების კოდექსის მრავალი მუხლის უხეში დარღვევა იყო. ბავშვი ძალადობის ყველა ფორმისგან დაცული უნდა იყოს. მშობლის საქმიანობის გამო ბავშვის დისკრიმინაცია დაუშვებელია.

ჩემი კანონიერი ვალდებულებაა, უზრუნველვყო ბავშვთა კონსტიტუციური უფლებების დაცვა და საერთაშორისო იურისდიქციული სტანდარტების განხორციელება. სწორედ ეს მოვალეობა და რაც მთავარია, დედის ინსტინქტი იყო ჩემი ოფიციალური საჩივრის საფუძველი მოვისმინეთ ცრუ ბრალდებები და სხვა დედებთან პარალელების გავლება.

არავინ გაბედოთ და ჩემი შვილები მოძალადე კრიმინალებთან, რადიკალებთან და ექსტრემისტებთან არ შეადაროთ. მე ვარ დედა 2 და 4 წლის მცირეწლოვნების, რომელთა ფუნდამენტური უფლებები უხეშად დაირღვა," — განაცხადა ქართული ოცნების დეპუტატმა მარიამ ლაშხმა პარლამენტის პლენარულ სხდომაზე.

შეგახსენებთ, ადმინისტრაციულ სამართალდარღვევათა კოდექსში თებერვალში შესული ცვლილებით, საქართველოს სახელმწიფო-პოლიტიკური თანამდებობის პირის სიტყვიერი შეურაცხყოფა, ლანძღვა-გინება, შეურაცხმყოფელი გადაკიდება ან/და სხვაგვარი შეურაცხმყოფელი ქმედების განხორციელება სამსახურებრივი მოვალეობის შესრულების დროს ან სამსახურებრივი მოვალეობის შესრულებასთან ან საქმიანობასთან დაკავშირებით გამოიწვევს დაჯარიმებას 1500 ლარიდან 4000 ლარამდე ოდენობით ან ადმინისტრაციულ პატიმრობას 45 დღემდე ვადით.