საქართველოს საგარეო საქმეთა სამინისტროში ევროინტეგრაციის გენერალური დირექტორატის გაუქმების შესახებ ინფორმაციას არ ადასტურებენ.

მათი თქმით, რეფორმის შედეგად, შეიქმნება ევროპის საქმეთა პოლიტიკური დირექტორატი, რომელიც ევროპისა და ევროინტეგრაციის დეპარტამენტებს გააერთიანებს.

"გავრცელებული ინფორმაცია იმის შესახებ, რომ სამინისტროში უქმდება ევროინტეგრაციის გენერალური დირექტორატი არ შეესაბამება სიმართლეს. რეფორმის შედეგად, შეიქმნება ევროპის საქმეთა პოლიტიკური დირექტორატი, იგი გააერთიანებს ევროპისა და ევროინტეგრაციის დეპარტამენტებს. თავის მხრივ ევროინტეგრაციის დეპარტამენტში შეიქმნება 4 სამმართველო, რომელიც მოემსახურება ქვეყნის ევროკავშირში ინტეგრაციის დღის წესრიგს. დირექტორატის შექმნა დამატებით შეუწყობს ხელს ხსენებული ამოცანების შესასრულებლად ევროპის ქვეყნებთან ურთიერთობების ეფექტიან კოორდინაციას", — ნათქვამია განცხადებაში, რომელსაც IPN ავრცელებს.

შეგახსენებთ, რომ დღეს, ლელო-ძლიერი საქართველოს წევრმა გრიგოლ გეგელიამ დღეს ბრიფინგზე განაცხადა, რომ ოცნების ხელისუფლების საგარეო საქმეთა მინისტრი ევროპული ინტეგრაციის გენერალურ დირექტორატს აუქმებს და თანამშრომლების გათავისუფლებას გეგმავს.

გუშინ, 31 აპრილს NEWS.On.ge-მ მოიპოვა მაკა ბოჭორიშვილის უწყების თანამშრომლებისთვის გაგზავნილი წერილი, სადაც ის საგარეო საქმეთა სამინისტროში რეფორმაზე წერს და რეორგანიზაციას აანონსებს.

ჩვენ ამ დრომდე ველოდებით უწყებისგან პასუხს და დეტალებს, სავარაუდოდ, დაგეგმილი რეორგანიზაციის შესახებ.