საქართველოს დამოუკიდებლობის დღისადმი მიძღვნილი ღონისძიებები თავისუფლების მოედანზე წვევამდელების მიერ სამხედრო ფიცის დადების ცერემონიით დაიწყება. თბილისის გარდა, წვევამდელები ფიცს ქვეყნის მასშტაბით კიდევ ხუთ ისტორიულ ადგილზე დადებენ — კახეთში, შიდა ქართლში, მცხეთა-მთიანეთში, იმერეთში და სამეგრელოში.

დღეს, საქართველოს დამოუკიდებლობის და უწყვეტი პროტესტის 180-ე დღეს, თბილისსა და საქართველოს 8 დიდ ქალაქში 40-მდე მეტი მარში, საპროტესტო და სადღესასწაულო ღონისძიება გაიმართება.

26 მაისს დაგეგმილი ღონისძიებების ჩამონათვალი:

თბილისი:

15:00 საათი — საჯარო მოხელეების მარში — "ეს დღე ჩვენია!" — რესპუბლიკის მოედანზე;

15:00 — საზოგადოებრივი მაუწყებლის მარში — საზოგადოებრივი მაუწყებელი;

15:00 საათი — პირველი რესპუბლიკის აღლუმი — წინაპრები და სოვლაბი — რესპუბლიკის მოედანი;

15:00 — 23:55 საათი, საქართველო კვლავ დაგიცავ! გაიმართება ღონისძიებები, რომლებიც მიეძღვნება ჩვენს წარსულს, აწმყოსა და მომავალს — რუსთაველის გამზირი;

16:00 — საქართველო ცოცხალი და დამოუკიდებელია — კულტურის მარში — ფილარმონია;

17:00 — საქართველოს დამოუკიდებლობის მარში — "ძლიერი საქართველო" — მარჯანიშვილის მეტრო;

17:00 — ფედერალისტების მარში — რუსთაველის ძეგლი;

19:00 საათი — წინააღმდეგობის პლატფორმის ინიციატივით — ერთად დამოუკიდებლობისთვის! — პარლამენტის წინ;

20:00 საათი — ძალა სტუდენტების ერთობაშია! — პირველი კლასიკური გიმნაზია

21:00 საათი — საზოგადოებას მიმართავს საქართველოს მე-5 პრეზიდენტი სალომე ზურაბიშვილი.

ქუთაისი:

19:00 საათი — დამოუკიდებლობისთვის! — მერიის წინ

ბათუმი:

19:00 საათი, ერთად დამოუკიდებლობისთვის! პროტესტის 180-ე დღე! — საკონსტიტუციო სასამართლოსთან

ზუგდიდი:

18:00 საათი, ერთად აღვნიშნოთ დამოუკიდებლობის დღე! წინააღმდეგობის 180-ე დღე! — იუსტიციის სახლის მიმდებარედ, ე.წ. "სკეიტ პარკის" ტერიტორიაზე

თელავი:

19:00 საათი, ერთად დამოუკიდებლობისთვის! — მერია

გორი:

17:00 საათი, ერთად დამოუკიდებლობისთვის! — საკრებულო

ახმეტა:

17:00 საათი, ერთად დამოუკიდებლობისთვის! პროტესტის 180-ე დღე! — მერია

ახალციხე:

18:00 საათი, ერთად დამოუკიდებლობისთვის! — შოთა რუსთაველის ძეგლთან

ჩხოროწყუ:

20:00 საათი, ერთად დამოუკიდებლობისთვის! — მერია.

როგორც ღონისძიებების ორგანიზატორები წერენ, "რუსთაველის გამზირი მთელი დღის განმავლობაში უმასპინძლებს საქართველოს თავისუფლებისთვის დაუღალავად მებრძოლ საზოგადოებას. დილიდან გაიმართება ღონისძიებები, რომლებიც მიეძღვნება ჩვენს წარსულს, აწმყოსა და მომავალს".

"1918 წლის 26 მაისს საქართველომ დამოუკიდებლობა გამოაცხადა და დემოკრატიული რესპუბლიკა დააფუძნა. 1991 წლიდან სსრკ-სგან განთავისუფლებულმა საქართველომ დამოუკიდებლობის დღედ კვლავ 26 მაისი აირჩია. 26 მაისი ჩვენი სამშობლოს თავისუფლების და დამოუკიდებლობის სიმბოლოა.

საქართველოს დამოუკიდებლობის აღსანიშნავად რუსთაველის გამზირი მთელი დღის განმავლობაში უმასპინძლებს საქართველოს თავისუფლებისთვის დაუღალავად მებრძოლ საზოგადოებას. დილიდან გაიმართება ღონისძიებები, რომლებიც მიეძღვნება ჩვენს წარსულს, აწმყოსა და მომავალს.

ჩვენს დამოუკიდებლობას კვლავ რუსეთის იმპერია ებრძვის, რომელმაც გაანადგურა პირველი რესპუბლიკა და წაშალა თავისუფლებისთვის მებრძოლი გმირების ისტორია. რუსი ივანიშვილის მარიონეტული მთავრობა კი დღესაც ცდილობს საქართველოს გმირების ღვაწლისა და თავისუფლების იდეის გაუფასურებას, საქართველოს განეიტრალებას, მის იზოლაციას და მეგობრების გარეშე ჩვენს მარტო დატოვებას რუსეთის პირისპირ.

მაგრამ ქართველი ხალხი შეუპოვრად და თავდადებით განაგრძობს ბრძოლას თავისუფლების და დამოუკიდებლობის შესანარჩუნებლად.

26 მაისს რუსთაველზე გაცოცხლდება საქართველოს ეროვნული მეხსიერება და ჩვენი გმირი წინაპრების კვალდაკვალ ხმამაღლა გაისმება ხმები, რომლებიც დღეს ყოველდღიური წინააღმდეგობით იცავენ სამშობლოს რუსთაველზე, საპატიმროებიდან, ემიგრაციიდან, საერთაშორისო ტრიბუნებიდან და ყველა შესაძლო ადგილიდან, სადაც ცოცხლობს წინააღმდეგობა!

და უწყვეტი პროტესტის 180-ე დღეს ერთ მუშტად შეკრული ქართული საზოგადოება კვლავ მტკიცედ აჩვენებს მტერსაც და მოყვარესაც: რომ საქართველოს ვიცავდით და ვიცავთ მარად!ვიცავდით და კვლავ დავიცავთ!

ბოლომდე! ერთად!", — ნათქვამია 26 მაისის ღონისძიებების ორგანიზატორების მიერ გავრცელებულ ინფორმაციაში.

ამის პარალელურად, ქართული ოცნების პრემიერმინისტრის, ირაკლი კობახიძის განკარგულებით, 26 მაისის შემეცნებით-გასართობი სივრცეები რუსთაველის გამზირის ნაცვლად, ალექსანდრეს ბაღსა და ორბელიანის ქუჩაზე მოეწყობა.

თავისუფლების მოედანზე გაიმართება ახალწვეულების ფიცის საზეიმო მიღება. 17:10-ზე, როცა საქართველოს დამოუკიდებლობა გამოცხადდა, საზეიმო აღნიშვნა იქნება ორბელიანის სასახლეში და მიმდებარე ტერიტორიაზე. დაგეგმილია გალა-კონცერტიც, რომელიც ასევე სატელევიზიო ეთერით იქნება უზრუნველყოფილი.

"თბილისში, ალექსანდრეს ბაღის, ორბელიანის ქუჩასა და მიმდებარე ტერიტორიაზე შემეცნებით-გასართობი სივრცეების მოწყობა: სპორტული აქტივობების სივრცე, კულტურული აქტივობების სივრცე, საგამოფენო სივრცე, საბავშვო სივრცეები, ღვინის სადეგუსტაციო და მოსასვენებელი სივრცე, ტერიტორიის გასაფორმებელი დეკორაცია" — ნათქვამია 15 აპრილს გამოცემულ განკარგულებაში.