ბრიტანელმა მეცნიერებმა დაადგინეს, რომ სხვადასხვა სამეცნიერო ლიტერატურის კითხვა სასარგებლოა თქვენი ჯანმრთელობისთვის. მართალია, ამით მეცნიერი ვერ გახდებით, მაგრამ რაღაცებში გაერკვევით და მერე იქნებ რამე საოცარი იდეაც დაგებადოთ, ვაშლი დაგეცეთ თავში ან კატა ჩასვათ ყუთში და ნობელის პრემიაც აიღოთ.

ჩვენ, ქართული მეცნიერების ქომაგებმა, გადავწყვიტეთ მოგაწოდოთ სამეცნიერო ლიტერატურის სია, რომელიც აუცილებლად უნდა წაიკითხოთ, გააანალიზოთ და შემდეგ ქვეყანას და კაცობრიობას გამოადგეთ.

მაშ ასე, 7 სამეცნიერო წიგნი, რომელიც დღესვე უნდა იყიდოთ და წაიკითხოთ. თაროზე შემოდება არ ითვლება.

1. ალბერტ აინშტაინი - იდეები და მოსაზრებები

ფოტო: Broadway Books

ალბერტ აინშტაინის პოპულარული ნაშრომების კრებული. შედგენილია თავად მეცნიერის მეთვალყურეობითა და დასტურით. მოიცავს მის ადრეულ და გვიანდელ ნაშრომებს. წიგნში თავმოყრილია აინშტაინის ტექსტები ფარდობითობაზე, ატომურ ომსა და მშვიდობაზე, რელიგიასა და მეცნიერებაზე, ადამიანის უფლებებზე, ეკონომიკაზე და სახელმწიფოზე.

წიგნის ბოლო ფურცელზე ნახავთ ქართულ წარწერას: "და ეს ბიჭი იყო აინშტაინი".

2. ერნსტ მაიერი - რა არის ევოლუცია

ფოტო: Basic Books

თუ გაინტერესებთ ევოლუციის თეორია (და ნეტა რატომ არ უნდა გაინტერესებდეთ), ეს წიგნი საუკეთესო საშუალებაა მის შესასწავლად და ბოლომდე გასაგებად. ერნსტ მაიერი მარტივი ენით ხსნის ბიოლოგიურ პროცესებს, ადარებს ევოლუციის თეორიას სხვა თეორიებსა და ფილოსოფიებს და პასუხს სცემს ყველა კითხვას, რომელიც შეიძლება ვინმეს დაებადოს.

3. ერვინ შროდინგერი - რა არის სიცოცხლე?

ფოტო: Cambridge University Press

არის ამ წიგნში კატაზე ლაპარაკი თუ არა? არის და არ არის.

წიგნში თავმოყრილია შროდინგერის საჯარო ლექციები, ავტობიოგრაფიული სკეჩები და სამეცნიერო თეორიები.

4. რიჩარდ როუდსი - როგორ იქმნებოდა ატომური ბომბი

ფოტო: Simon & Schuster

მანჰეტენის პროექტისა და ატომური იარაღის ისტორია. რიჩარდ როუდსის წიგნი მოგვითხრობს ყველაფერს, ატომური ენერგიის აღმოჩენიდან - იაპონიაში, პირველი ბომბის ჩამოგდებამდე.

5. თიმოთი ფერისი - როგორ ვეცნობოდით ირმის ნახტომს

ფოტო: Harper Perennial

როგორ ეცნობოდა და სწავლობდა კაცობრიობა კოსმოსს. ასტრონომიის ისტორია, კვლევის მეთოდები, ადამიანები, რომლებმაც სამეცნიერო გარღვევები და გარდატეხები მოახდინეს. ყველაფერი პტოლომედან - დღემდე.

6. სუზან გარფილდი - მოგზაურობა ადამიანის ტვინში

ფოტო: Basic Books

რამდენი მითი გსმენიათ ადამიანის ტვინის შესახებ? მაგალითად, ჩვენი ტვინის მხოლოდ 3-4 პროცენტს რომ ვიყენებთ და გენიოსები შვიდს? გაიგეთ ყველაფერი ადამიანის ტვინის, მისი ყველა ნაწილისა და ფუნქციის შესახებ.

7. კრის მაკგოვანი - დიატომებიდან დინოზავრებამდე

ფოტო: Island Press

გაიზრდებიან მწერები პტეროდაქტილების ზომამდე? რატომ არიან ჭიანჭველები ასეთი ძლიერები? რა საერთო აქვთ მოლუსკს, კონდორს, კუსა და ზუთხს? როგორ უძლებდა დინოზავრის ჩონჩხი 28 ტონიანი სხეულის მასას? როგორ მიეწოდება ჟირაფს სისხლი გულიდან ტვინამდე? ამ და სხვა უამრავ შეკითხვას პასუხს სცემს კრის მაკგოვანი და მიმოიხილავს სიცოცხლის ფიზიკას.

ცხადია, ეს სია სრული არ არის, მაგრამ ვიდრე ამ წიგნებს წაიკითხავთ, ჩვენ მომდევნო სიას მოგიმზადებთ.