ე.წ. კაბელების საქმეზე, პირველი ინსტანციის გადაწყვეტილება თავისუფალი დემოკრატების წევრებმა გააპროტესტეს. დღეს, 16 ივნისს, თბილისის სააპელაციო სასამართლოსთან აქცია გაიმართა სახელით "უსამართლო სასამართლო".

საქალაქო სასამართლოს გადაწყვეტილება უკვე გასაჩივრდა სააპელაციო გზით. პარტიის წევრები, სააპელაციოს მოსამართლეებს ობიექტურობისკენ მოუწოდებენ. ირაკლი ალასანიას განცხადებით, მათთვის ერთადერთი გზა სამოქალაქო ბრძოლაა:

"ჩვენ ასეულ ათასობით მოქალაქეთა ხელმოწერას შევაგროვებთ პეტიციის სახით, რათა 5 უდანაშაულო თავდაცვის სამინისტროს თანამშრომელი ტყვეობიდან გათავისუფლდეს. თუ ჩვენი ხელით, ჩვენი ბრძოლით არ მოვიპოვეთ სამართლიანობა, თავისით, მურუსიძის ხელით, ივანიშვილის რეჟიმი სასამართლოს არ გაათავისუფლებს. ეს კარგად ჩანს ყველა სასამართლო ინსტანციაში და განსაკუთრებით სააპელაციოში".

ალასანიას განცხადებით, ის ცვლილებები რაც საკონსტიტუციო სასამართლოსთან მიმართებაში განხორციელდა, იმაზე მეტყველებს, რომ სხვა ინსტანციების მსგავსად, უნდათ რომ გავლენა მოახდინონ საკონსტიტუციო სასამართლოზეც.

ზურაბ აბაშიძის თქმით, მათ სააპელაციო სასამართლოს იმედი არ აქვთ და აქციებისა და ხელმოწერების გზით აპირებენ ბრძოლას:

"საკონსტიტუციო სასამართლოში გასაჩივრებულია ის მუხლი, რის გამოც ეს ადამიანები ციხეში აღმოჩდნენ. ჩვენ ბოლომდე გავაგრძელებთ ბრძოლას, რომ ჩვენი მეგობრები ციხიდან დავიხსნათ".

სააპელაციო სასამართლომ ერთი თვის ვადაში უნდა გადაწყვიტოს, როდის დაიწყება ე.წ. კაბელების საქმეზე მსჯელობა.

კაბელების საქმე: დეტალები მოკლედ