ბათუმის საქალაქო სასამართლოში, მზია ამაღლობელის სასამართლო პროცესი მიმდინარეობს.

დღევანდელ პროცესზე ბრალდების მხარის მოწმეა სამედიცინო ექსპერტი გივი ჩხარტიშვილი. სწორედ მან ჩაუტარა ბათუმის პოლიციის უფროსის, ირაკლი დგებუაძის ლოყას მზია ამაღლობელის მიერ სილის გაწვნიდან მეორე დღეს ექსპერტიზა.

ექსპერტის თქმით, მას არ ახსოვს სიწითლე აღენიშნებოდა თუ არა დგებუაძეს ლოყაზე და დასძინა, რომ "სიწითლე დაზიანების ობიექტური ნიშანი არ არის".

"სიწითლე დაზიანების ობიექტური ნიშანი არ არის, შესაბამისად, ეს არ არის ჩემი შეფასების საგანი. ჩემი შეფასების საგანი არის უშუალოდ დაზიანების ობიექტური ნიშნების შეფასება, ამ კონკრეტულ შემთხვევაში, რადგან აღნიშნულ პიროვნებას [ირაკლი დგებუაძეს] არ ჰქონდა დაზიანების რაიმე ობიექტური ნიშანი, შესაბამისად, გაიცა შესაბამისი დასკვნა.

იმ დროს აღენიშნებოდა თუ არა სიწითლე? მართალი გითხრათ არ მახსოვს, რომც ყოფილიყო არა მგონია, მიმეთითა დასკვნაში, რადგანაც უშალოდ სიწითლე არ არის ობიექტური დაზიანების ნიშანი. მე მხოლოდ ვაფასებ დაზიანების ობიექტურ ნიშნებს, სიწითლე რახან არ არის დაზიანების ობიექტური ნიშანი, შესაბამისად, ის ჩემი შეფასების საგანი არ არის," — თქვა მან.

ჩხარტიშვილმა ასევე განაცხადა, რომ დგებუაძე მარჯვენა ყურის ნიჟარის არეში "სუსტ ტკივილს" უჩიოდა.

"როცა უშუალოდ ვამოწმებდი, ექსპერტიზის დროს, შესამოწმებელი პირი უჩიოდა სუსტ ტკივილს მარჯვენა ყურის ნიჟარის არეში. უკავშირებდა თუ არა ფაქტს, ჩემთვის ცნობილი არ არის,"— განაცხადა აჭარის ექსპერტიზის დეპარტამენტის ექსპერტმა, გიგი ჩხარტიშვილმა.

დგებუაძეს გარდა, იმაზე დღეს მზია ამაღლობელსაც ჩაუტარდა ექსპერტიზა. ჩხარტიშვილის განცხადებით, ამაღლობელს მარცხენა მხრის არეში აღენიშნებოდა სისხლნაჟღენთები, რომელიც განვითარებულია ბლაგვი საგნის მოქმედების შედეგად.

"იმავე დღეს წარდგა მოქალაქე მზია ამაღლობელი, 15:24 წუთზე, რომელსაც ასევე ჩაუტარდა ექსპერტიზა და გაიცა დასკვნა, რომლის თანახმადაც მზია ამაღლობელს მარცხენა მხრის არეში აღენიშნებოდა სისხლნაჟღენთები. დაზიანებები განვითარებულია ბლაგვი საგნის მოქმედების შედეგად, მიეკუთვნება მსუბუქ ხარისხს ჯანმრთელობის მოშლის გარეშე და მიეკუთვნება მსუბუქ ხარისხს ჯანმრთელობის მოშლის გარეშე და ხანდაზმულობით არ ეწინააღმდეგება საქმის გარემოებაში მითითებულ თარიღს," — თქვა მან.

შეგახსენებთ, 8 მაისს, წინა სასამართლო სხდომაზე მოწმის სტატუსით ბათუმის პოლიციის უფროსი, ირაკლი დგებუაძე დაიკითხა. დგებუაძე სწორედ ის პოლიციელია, ვისზე "ფიზიკურ თავდასხმასაც" ედავებიან მზია ამაღლობელს.

პოლიციის უფროსმა სასამართლო პროცესზე ისევ გაიმეორა, რომ მან სილის გაწვნისგან იგრძნო ტკივილი და რატომღაც "ეს ფაქტი სასაცილოა საზოგადოებისთვის".

"ჩემს მიერ განცდილი ტკივილი ძალიან სასაცილო გახდა საზოგადოებაში. კითხვა მაქვს ლოგიკური: სახეში როცა გირტყამენ, თავს გესხმიან... ქართულს კარგად ვსწავლობდი: თუ ვინმე სინონიმს მეტყვის, რას განიცდის ადამიანი სახეში დარტყმის დროს, მე განვიცადე ტკივილი," — თქვა დგებუაძემ.

ასევე იხილეთ: