"ეს არის პროკურატურის მიერ გამოძიების პროცესში ჩატარებული ჩხრეკები, რომელიც კანონიერი პროცედურების შესაბამისად მიმდინარეობს. არ ვიცი ვინ ატარებდა ჩხრეკას, თუმცა ვინც ატარებს, დარწმუნებული ვარ, ყველანაირად ყველანაირად კანონიერი საფუძვლით მიდის ეს ყველაფერი", — ოცნების პარლამენტის თავმჯდომარე, შალვა პაპუაშვილი თბილისის რამდენიმე მისამართზე მიმდინარე ჩხრეკებს ეხმაურება.

მისი თქმით, "გარედან არის მცდელობა, მოაწყონ დესტაბილიზაცია, შეეცადონ არადემოკრატიული გზით ხელისუფლების შეცვლას, ამიტომ პროკურატურამ ამ მხრივ ქართველ ხალხს პასუხი უნდა გასცეს".

"რაც შეეხება ჩხრეკებს, ეს არის პროკურატურის მიერ გამოძიების პროცესში ჩატარებული ჩხრეკები, რომელიც კანონიერი პროცედურების შესაბამისად მიმდინარეობს. არ ვიცი ვინ ატარებდა ჩხრეკას, თუმცა ვინც ატარებს, დარწმუნებული ვარ, ყველანაირად კანონიერი საფუძვლით მიდის ეს ყველაფერი. შესაბამის განმარტებებს პროკურატურა მოგცემთ, დარწმუნებული ვარ. გამოძიების მიმდინარეობისას ერთ-ერთი ღონისძიება რაც არის ხოლმე საჭირო, არის ჩხრეკა, იმისთვის, რომ სხვადასხვა მტკიცებულება იქნას ამოღებული. მნიშვნელოვანია, პროკურატურამ ჩაატაროს, რადგან იმ გამოძიებებს, რომელიც მიმდინარეობს, ექნება სრული სურათი და პასუხი ჩვენი საზოგადოებისთვის - რასთან გვაქვს საქმე. ცალსახად ვხედავთ, რომ გარედან არის მცდელობა, მოაწყონ დესტაბილიზაცია, შეეცადონ არადემოკრატიული გზით ხელისუფლების შეცვლას, ამიტომ პროკურატურამ ამ მხრივ ქართველ ხალხს პასუხი უნდა გასცეს. ეს არის მნიშვნელოვანი და სწორი ნაბიჯები იმ მხრივ, რომ საზოგადოებას ჰქონდეს სრული სურათი, რასთან გვაქვს საქმე", — განაცხადა პაპუაშვილმა.

შეგახსენებთ, რომ დღეს დილიდან პროკურატურის წარმომადგენლები ჟურნალისტ ნანუკა ჟორჟოლიანის, ფონდ სირცხვილიას დამფუძნებლის, მარიამ ბაჯელიძის, ადამიანის უფლებათა ცენტრის ხელმძღვანელის, ალეკო ცქიტიშვილის და აქტივისტ მარიამ გეგუჩაძის სახლებში ჩხრეკის ჩასატარებლად შევიდნენ.

სავარაუდოდ, ჩხრეკა იმ ფონდების დამფუძნებლების სახლებში მიმდინარეობს, რომლებიც საპროტესტო აქციაზე დაჯარიმებული ან დაზარალებული მოქალაქეებისთვის თანხებს აგროვებდნენ. აღსანიშნავია, რომ ლაივ-ვიდეოებში პროკურატურის თანამშრომლები ჩხრეკის საფუძვლად იმ მუხლებს ასახელებენ, რომლებზეც პროკურატურამ გამოძიება ქართულ ოცნებასთან აფილირებული ნეიტრალური საქართველოს მიმართვის საფუძველზე დაიწყო. ამ ორგანიზაციის ლიდერი ვატო შაქარაშვილია.