24 აპრილის სასამართლო პროცესზე, პროევროპულ აქციებში მონაწილეობისთვის ჯგუფური ძალადობის ბრალდებით დაკავებულმა, ანდრო ჭიჭინაძემ ირაკლი კობახიძის მიერ რუსთავი 2-ის ეთერში გაკეთებულ განცხადებებზე ისაუბრა, სადაც ოცნების პრემიერმა შეურაცხყოფა მიაყენა სინდისის პატიმარ მზია ამაღლობელს და სხვა სინდისის პატიმრების ოჯახის წევრებს.

"როცა ადამიანს [ირაკლი კობახიძეს] შეუძლია პატიმარ ქალს [მზია ამაღლობელს] ცილისწამებით და ტყუილით შეეხოს და პატიმრის ოჯახზე ილაპარაკოს ისე, როგორც ილაპარაკა, ეს არის არაკაცობა და მეტი არაფერი" — განაცხადა ანდრო ჭიჭინაძემ.

ამას გარდა, ჭიჭინაძის თქმით, ირაკლი კობახიძემ გამოძიების დასრულებამდე "მიუსაჯა" სინდისის პატიმრებს სასჯელი.

"პრემიერმინისტრმა პირდაპირ დაგვადანაშაულა ჩვენ იმაში, რაშიც პროკურატურა გვედავება. დაარღვია უდანაშაულობის პრეზუმფცია. წინასწარ მოგვისაჯა და მერე დაიწყო ლაპარაკი რაღაც ჰუმანურობაზე. პირდაპირ გეუბნებით, რომ მე არავის ჰუმანურობა არ მჭირდება," — განაცხადა ანდრო ჭიჭინაძემ სასამართლოზე.

შეგახსენებთ, ოცნების პრემიერმინისტრმა, ირაკლი კობახიძემ რუსთავი 2-ის ეთერში განაცხადა, რომ გამოცემა ბათუმელების და ნეტგაზეთის დირექტორი მზია ამაღლობელი მსხვერპლი არ არის, ის კონკრეტულ დაკვეთას ასრულებდა და მისი დავალება იყო პოლიციის დაკნინება და ღირსების შეურაცხყოფა. საპატიმროებში მყოფთა დიდი ნაწილი კი პროპაგანდის მსხვერპლია.