Dr. Phil-ის ახალი სეზონი საკმაოდ ემოციურად დაიწყო. ირლანდიელმა მომღერალმა და კომპოზიტორმა შინეიდ ო'კონორმა შოუში თავის ბავშვობაზე და დედაზე, მარიაზე, ისაუბრა.

ო'კონორის თქმით, ის დაბადებიდან 13 წლამდე ძალადობის ქვეშ იზრდებოდა. მუსიკოსი იხსენებს, რომ დედა მას სასტიკად სცემდა და მისი რეპროდუქციული სისტემის განადგურება სურდა.

"პირველი მოგონებები დედაზე მისი სიტყვებია, რომ არ უნდა დავბადებულიყავი. მას მე არ ვჭირდებოდი. დედაჩემს უნდოდა, ბიჭი ვყოფილიყავი, გადახოტრილი ვყავდი და ისე მექცეოდა, როგორც ბიჭს".

ო'კონორი ყვება, რომ დედა მას ყოველდღიურად სცემდა და ძალადობის საშინელ მომენტებს იხსენებს:

"როდესაც მცემდა, და ეს ყოველდღე ხდებოდა, ის მაიძულებდა ტანსაცმელი გამეხადა, იატაკზე შიშველი დავწოლილიყავი და ხელები და ფეხები გამეშალა. ის მუცელზე მირტყამდა, რომ ჩემი საშვილოსნო გაენადგურებინა. მას უნდოდა, რომ გოგო არ ვყოფილიყავი.

ცემის დროს მაიძულებდა მეყვირა, რომ არარაობა ვიყავი, მანამ სანამ ამას არ დავიჯერებდი. მისთვის ჩემს ტკივილს ღიმილი და ბედნიერება მოჰქონდა. ის ავად იყო. ის ან სადისტი და პედოფილი იყო, ან ეშმაკისგან შეპყრობილი.

5 წლის ასაკში ჩემი დის კაბა ჩამაცვა, რომელსაც ღილი აკლდა. როდესაც მან ეს შენიშნა, ოთახში ნათურა მოხსნა, ჩამკეტა და მთელი შაბათ-კვირა სახლში მარტო დამტოვა".

მომღერლის თქმით, სკოლაში არდადეგების დაწყება ყველა ბავშვს უხაროდა, მის გარდა:

"ეს ჩვენი ცხოვრების ყველაზე უბედური დღე იყო. მე და ჩემი და-ძმები ვტიროდით, რადგან მთელი ზაფხული მასთან ერთად უნდა გაგვეტარებინა სახლში. ჰოკეის ჯოხებს და ჩოგნებს ვმალავდით, რადგან ის ჩვენს საცემრად მათ იყენებდა".

მუსიკოსი დასთან და სამ ძმასთან ერთად იზრდებოდა, თუმცა მათ გამოცდილებებზე საჯაროდ საუბარს არ აპირებს.

მიუხედავად დედაზე არსებული საშინელი მოგონებებისა, ის ამბობს, რომ მას დედა ენატრება და ის ტკივილი, რაც მან დაუტოვა, უკვე აპატია.

"საშინლად მძულს ის შეგრძნება, რომ მისი სიყვარული არ შემიძლია. არ შემიძლია მასზე ზრუნვა, სიყვარულის გამოხატვა ან დახმარება. მას არავინ დახმარებია. ვერ ვიტან იმ შეგრძნებას, რომ არ შემიძლია მას ხელები მოვხვიო და ვუთხრა, რომ მიყვარს და რომ ის კარგი დედა იყო. მე მასზე ვიზრუნებდი, ნამდვილი მონსტრი რომ არ ყოფილიყო".

წამყვანის კითხვაზე, რა უყვარს ყველაზე მეტად საკუთარი დედის შესახებ, შინეიდმა უპასუხა:

"ის, რომ ის მკვდარია. ძალიან უცნაურია, რომ პირველი ეს მომივიდა თავში, მაგრამ მიხარია, რომ ის მკვდარია. ეს ერთადერთი სიკეთეა, რაც მას გაუკეთებია. მაგრამ ის მენატრება და მის გამო გული საშინლად მტკივა. ჩემი სუიციდური ინსტინქტი სწორედ იქედან მოდის, რომ მე დედასთან მინდა. ველოდები იმ დღეს, როცა მას სამოთხეში ვნახავ. მაიმუნივით შევახტები და ვეტყვი, რომ მიყვარს და მენატრებოდა".

მუსიკოსის თქმით, დედამ მისი ცემა მაშინ შეწყვიტა, როცა ის მას სიმაღლეში დაეწია:

"როდესაც დიდობაში ვკითხე, ამას რატომ გვიკეთებდა, მან ყველაფერი უარყო. ამის შემდეგ, ცხრა თვე არ ველაპარაკებოდი. ის სწორედ ამ პერიოდში გარდაიცვალა".

ო'კონორის დედა 1986 წელს ავარიაში დაიღუპა, როდესაც შინეიდი 19 წლის იყო.