მომღერალმა ლედი გაგამ თავის ტვიტერზე დაწერა, რომ მას ქრონიკული ფიბრომიალგია აქვს, რომელიც ორგანიზმში ქრონიკულ ტკივილს იწვევს.

"მსურს დავეხმარო და გავზარდო ცნობიერება ამ დაავადების შესახებ, გავაერთიანო ის ადამიანები, ვინც ამ დაავადებით იტანჯებიან", - წერს გაგა.

როგორც ცნობილია ლედი გაგას ტკივილები წლების წინ დაეწყო, ამაზე საჯაროდ საუბარი კი მხოლოდ ახლახანს დაიწყო.

ცნობილია ისიც, რომ გაგას პოსტტრამვული აშლილობაც აქვს. ამის შესახებ მან რამდენიმე თვის წინ LGBTQ თემის უსახლკარო ახალგაზრდების თავშესაფარში სტუმრობის დროს ისაუბრა.

შოუს ერთ-ერთ ნაწილში, რომელსაც "გაუზიარე სიკეთე" ჰქვია, გაგამ სიმღერა Til It Happens To You შეასრულა, რომელიც სექსუალური ძალადობის მსხვერპლებს მიუძღვნა. შემდეგ კი მომღერალმა ახალგაზრდებს გაანდო, რომ ის 19 წლის ასაკში გააუპატიურეს და ამის გამო ფსიქოლოგიური პრობლემები დღემდე აქვს.

როგორც ლედი გაგამ აღნიშნა, პოსტტრავმულ სტრესულ აშლილობას დღემდე ებრძვის.

"არასდროს მითქვამს ეს, მაგრამ ახლა ვამბობ. ექიმების, ოჯახისა და მეგობრების სიკეთემ გადამარჩინა. ჩემი პირადი ტრავმა კი დამეხმარა, რომ სხვა ადამიანების ტკივილი უფრო ახლოს მიმეტანა გულთან" - თქვა გაგამ.

რაც შეეხება ფიბრომიალგიას, მას სხეულის კუნთების ტკივილი ახასიათებს. ტკივილს თან ახლავს სისუსტე, ძილის, მეხსიერებისა და გუნება-განწყობის გაუარესება.