უკრაინას შეუძლია ოდესის ყოფილი გუბერნატორი, მიხეილ სააკაშვილი საქართველოს არ გადასცეს მანამ, სანამ საქართველოში სასამართლო მის საქმეზე განაჩენს არ გამოიტანს, წერს ადგილობრივი გამოცემა Ukraynska Pravda. ამის შესახებ უკრაინის იუსტიციის მინისტრის მოადგილემ, დენის ჩერნიშოვმა:

"უკრაინაში ჯერ არაფერი მომხდარა გარდა იმისა, რომ მიხეილ სააკაშვილმა საზღვარი გადმოკვეთა. ის დოკუმენტები, რომლებიც ჩვენთან [იუსტიციის სამინისტროში] და გენერალურ პროკურატურაში მოვიდა, ადასტურებს, რომ საქართველოში მის წინააღმდეგ სისხლის სამართლის საქმეა აღძრული."

კითხვაზე შეუძლია თუ არა უკრაინას სააკაშვილის ექსტრადირება სასამართლო განაჩენის გარეშე, მინისტრის მოადგილემ უპასუხა:

"ამ დროისთვის უკრაინის პროკურატურა მიღებულ დოკუმენტებზე დასკვნებს აკეთებს. ამის შემდეგ იუსტიციის სამინისტრო გააგრძელებს სააკაშვილის ექსტრადირების საკითხის განხილვას უკრაინისა და საერთაშორისო სამართლის ნორმების გათვალისწინებით."

სექტემბრის დასაწყისში უკრაინის იუსტიციის მინისტრის განცხადებით, საქართველოს პროკურატურამ უკრაინას სააკაშვილის მოძებნის, დაკავებისა და ექსტრადიციის მოთხოვნით კიდევ ერთხელ მიმართა. საქართველოს იუსტიციის მინისტრის თქმით, სააკაშვილის ექსტრადირებით უკრაინული მხარე დაინტერესდა.

2015 წელს უკრაინის გენერალურმა პროკურატურამ საქართველოს ექს-პრეზიდენტის, მიხეილ სააკაშვილის ექსტრადირების მოთხოვნა არ დააკმაყოფილა. გადაწყვეტილება კი იმით ახსნა, რომ სამშობლოში ის პოლიტიკური მოტივების გამო იდევნებოდა.

10 სექტემბერს სამართალდამცავების წინააღმდეგობის მიუხედავად უკრაინის ტერიტორიაზე მყოფმა სააკაშვილის მხარდამჭერებმა კორდონი გაარღვიეს და სააკაშვილი უკრაინის ტერიტორიაზე გადაიყვანეს. ამ ფაქტთან დაკავშირებით უკრაინაში გამოძიება უკვე დაიწყო. მიხეილ სააკაშვილს უკრაინის მოქალაქეობა პრეზიდენტ პოროშენკოს გადაწყვეტილებით 26 ივლისს, ამერიკაში ვიზიტისას ჩამოერთვა.