ოცნების პრემიერმა, ირაკლი კობახიძემ ევროსაბჭოს საპარლამენტო ასამბლეაში (PACE) საქართველოსთან დაკავშირებით ჩანიშნულ დებატებზე განაცხადა, რომ ოცნების საქმიანობა საპარლამენტო ასამბლეაში მათი მხრიდანაა შეჩერებული და "ფაქტობრივად, გადასაწყვეტიც არაფერი აქვთ".

"ჩვენთვის საინტერესო არ არის. ვთქვით, რომ ჩვენს საქმიანობას ევროპის საბჭოს საპარლამენტო ასამბლეაში ვაჩერებთ. ახლა, ფაქტობრივად, გადასაწყვეტიც არაფერი აქვთ — ჩვენი საქმიანობა საპარლამენტო ასამბლეაში ჩვენი მხრიდან არის შეჩერებული", — განაცხადა კობახიძემ.

ევროპის საბჭოს საპარლამენტო ასამბლეა (PACE) საქართველოს საკითხზე დებატებს 10 აპრილს გამართავს. PACE-ის ცნობით, განხილული იქნება საქართველოში არსებული ვითარება და საქართველოზე მიღებული 2025 წლის რეზოლუციასთან დაკავშირებული შემდგომ ქმედებები, რომელიც საქართველოს დელეგაციის მანდატების რატიფიცირებას ეხება.

შეგახსენებთ, რომ 29 იანვარს ევროსაბჭოს საპარლამენტო ასამბლეამ (PACE) საქართველოზე რეზოლუცია მიიღო, სადაც PACE ოცნებას ვადამდელი არჩევნების დანიშვნისა და პოლიტპატიმრების გათავისუფლებისკენ მოუწოდებდა.

რეზოლუციის მიღებიდან მალევე, ევროსაბჭოში ქართული ოცნების დელეგაციის ხელმძღვანელმა, თეა წულუკიანმა განაცხადა, რომ ოცნების გუნდის გადაწყვეტილებით, საქართველო ევროსაბჭოს საპარლამენტო ასამბლეაში მუშაობას წყვეტს.