ევროპის საბჭოს საპარლამენტო ასამბლეის (PACE) საგაზაფხულო სესიაზე, რომელიც სტრასბურგში 2025 წლის 7-დან 11 აპრილამდე გაიმართება, გადაუდებელი დებატებია დაგეგმილი საქართველოში არსებული ვითარებასა და საქართველოზე მიღებულ 2025 წლის რეზოლუციასთან დაკავშირებულ შემდგომ ქმედებებზე, რომელიც საქართველოს დელეგაციის მანდატების რატიფიცირებას ეხება.

ევროპის საბჭოს საპარლამენტო ასამბლეა საქართველოს საკითხზე დებატებს 10 აპრილს გამართავს.

საგაზაფხულო სესიის დღის წესრიგშია ასევე შემდეგი თემები:

"სტამბულის მერის დაპატიმრება და დემოკრატიისა და ადამიანის უფლებების მდგომარეობა თურქეთში"; "უკრაინის ომზე პასუხისმგებლობის საჭიროება, დაუსჯელობის თავიდან აცილება"; და ღაზას ჰუმანიტარული ბლოკადის დაუყოვნებლივ შეწყვეტა.

შეგახსენებთ, რომ 29 იანვარს ევროსაბჭოს საპარლამენტო ასამბლეამ (PACE) საქართველოზე რეზოლუცია მიიღო, სადაც PACE ოცნებას ვადამდელი არჩევნების დანიშვნისა და პოლიტპატიმრების გათავისუფლებისკენ მოუწოდებდა.

რეზოლუციის მიღებიდან მალევე, თეა წულუკიანმა განაცხადა, რომ ოცნების გუნდის გადაწყვეტილებით, საქართველო ევროსაბჭოს საპარლამენტო ასამბლეაში მუშაობას წყვეტს.

PACE-ის რეზოლუციის მიღებას ხმა 114-მა წევრმა მისცა, წინააღმდეგი 13 იყო.

ევროსაბჭოს საპარლამენტო ასამბლეის მიხედვით, PACE საქართველოს დელეგაციას აღიარებს იმ პირობით, თუ აპრილამდე ახალი, ჭეშმარიტად დემოკრატიული არჩევნების ორგანიზება მოხდება, რომელიც მკაცრი საერთაშორისო მონიტორინგის ქვეშ და სახელმწიფო ინსტიტუტებისა და საარჩევნო ადმინისტრაციის პოლიტიკური დამოუკიდებლობის პირობებით ჩატარდება და ყველა პოლიტპატიმარი გათავისუფლდება.

ევროსაბჭოს საპარლამენტო ასამბლეის მომდევნო სესიაზე PACE საქართველოს დელეგაციის უფლებამოსილების საკითხს გადახედავს და რეზოლუციაში წარდგენილი მოთხოვნების შეუსრულებლობის შემთხვევაში, შესაძლოა, მისი ჩამორთმევის საკითხი დადგეს.

რეზოლუციის ტექსტით გათვალისწინებული შეზღუდვების მიხედვით, ოცნების დელეგატებს აღარ ექნებათ:

• პოლიტიკურ საქმეთა და დემოკრატიის, მონიტორინგის, სამართლებრივი საქმეებისა და ადამიანის უფლებების, ადამიანის უფლებათა ევროპული სასამართლოს მოსამართლეთა არჩევის, პროცედურული კანონების, იმუნიტეტისა და ინსტიტუციურ საქმეთა კომიტეტების სრული ან მოადგილეობრივი წევრობის უფლება;

• არჩევნების დამკვირვებელი კომიტეტების წევრობის უფლება; მომხსენებლად დანიშვნის უფლება;

• ასამბლეის საპრეზიდენტო ოფისის, კომიტეტის ან ქვეკომიტეტის თავმჯდომარის ან ვიცე თავმჯდომარის კანდიდატად წარდგენის უფლება;

• უფლება წარმოადგინონ ასამბლეა ევროპის საბჭოს ორგანოებში ბიუროს გადაწყვეტილებით და უფლება წარმოადგინოს ასამბლეა პერიოდულად ევროპის საბჭოს ორგანოების, საერთაშორისო ორგანიზაციების ან საპარლამენტთაშორისო ასამბლეების მიერ ორგანიზებულ ღონისძიებებზე, შეხვედრებზე, კონფერენციებზე.