აშშ-ის გლობალური მედიის სააგენტო (USAGM) სასამართლოში მის წინააღმდეგ შეტანილი სარჩელის განხილვის დაწყებამდე დათანხმდა რადიო თავისუფალ ევროპა/რადიო თავისუფლებას (RFE/RL), გამოუყოს კონგრესის მიერ განსაზღვრული გრანტის ნაწილი.

ამის შესახებ რადიო თავისუფლება წერს.

24 მარტს გადადგმული ნაბიჯი ნიშნავს, რომ რადიო თავისუფალი ევროპა/რადიო თავისუფლება მიიღებს 7,46 მილიონ დოლარს — თანხას, რომელიც მას უნდა მიეღო მარტის პირველ 14 დღეში, სანამ 14 მარტს აშშ-ის კონგრესი ფედერალური დაფინანსების გაგრძელების შესახებ ახალ რეზოლუციას მიიღებდა, ხოლო 15 მარტს USAGM რადიოსთვის გრანტის შეწყვეტის თაობაზე გადაწყვეტილებას გამოაცხადებდა.

რადიო თავისუფალი ევროპა/რადიო თავისუფლებამ (RFE/RL) სასამართლოში უჩივლა შეერთებული შტატების გლობალური მედიის სააგენტოს (USAGM) და მის თანამდებობის პირებს, კერი ლეიკს და ვიქტორ მორალესს, რათა დაბლოკოს მათი მცდელობა, შეწყდეს აშშ-ის კონგრესის მიერ მედიასაშუალებისთვის დამტკიცებული დაფინანსება.

RFE/RL-ს საჩივარში, რომელიც 18 მარტს აშშ-ში წარედგინა კოლუმბიის ოლქის სასამართლოს, ნათქვამია, რომ კონგრესის მიერ გამოყოფილ სახსრებზე უარი არღვევს ფედერალურ კანონებს, მათ შორის აშშ-ის კონსტიტუციას, რომელიც კონგრესს ანიჭებს ექსკლუზიურ უფლებამოსილებას ფედერალური ხარჯების საკითხში.

"ახლა იმის დრო არ არის, რომ ადგილი დავუთმოთ ამერიკის მოწინააღმდეგეთა პროპაგანდას და ცენზურას. მიგვაჩნია, რომ კანონი ჩვენს მხარესაა და მთელ მსოფლიოში დესპოტების მიერ ჩვენი აღსასრულის ზეიმი ნაადრევია", — განაცხადა RFE/RL-ს პრეზიდენტმა სტივენ კაპუსმა.

14 მარტს აშშ-ის პრეზიდენტმა ხელი მოაწერა აღმასრულებელ ბრძანებას შვიდი სააგენტოს, მათ შორის გლობალური მედიის სააგენტოს (USAGM) საქმიანობის შეწყვეტის შესახებ, რომელიც რადიო თავისუფლებას და ამერიკის ხმას კურირებს.

ტრამპის ბრძანების გამოქვეყნების შემდეგ გლობალური მედიის სააგენტომ გამოგზავნა წერილი, რომელშიც ნათქვამია, რომ რადიო თავისუფლებას აშშ-ის კონგრესის მიერ დამტკიცებული გრანტი უწყდება.

17 მარტს თეთრმა სახლმა გაავრცელა განცხადება სათაურით "რადიკალური ამერიკის ხმა", სადაც მაუწყებლისთვის დაფინანსების შემცირების მიზეზად რადიკალური პროპაგანდა დაასახელა.

მეტი რადიო თავისუფლების შესახებ: