ევროკავშირის ქვეყნებმა ორშაბათს განაცხადეს, რომ შეეცდებიან გადაარჩინონ რადიო თავისუფალი ევროპა/რადიო თავისუფლება. ამის შესახებ Reuters წერს.

ჩეხეთის საგარეო საქმეთა მინისტრმა იან ლიპავსკიმ ევროკავშირის მინისტრებს ბრიუსელში გამართულ შეხვედრაზე მოუწოდა, რომ განიხილონ გზები, რათა პრაღაში დაფუძნებულ მაუწყებელს მიეცეს საშუალება, განაგრძოს ახალი ამბების გაშუქება იმ ქვეყნებში, სადაც თავისუფალი მედია აკრძალულია ან ჩანასახის ეტაპზეა.

მან 16 მარტს ჩეხეთის ტელევიზიის ეთერში განაცხადა, რომ პრაღის მთავრობა ევროკავშირის დონეზე განიხილავს "რადიო თავისუფლების" მომავალს.

"ასეთი მაუწყებლობის გაგრძელება ევროპის ინტერესებშია", — განაცხადა ლიპავსკიმ. "ჩვენს ინტერესებშია, რომ ტოტალიტარიზმი არ მიეცეს გასაქანი ჩვენს სამეზობლოში", — დასძინა მან.

საგარეო საქმეთა და უსაფრთხოების პოლიტიკის საკითხებში ევროკავშირის უმაღლესმა წარმომადგენელმა კაია კალასმა განაცხადა, რომ სამწუხაროა იმის მოსმენა, რომ აშშ წყვეტს რადიო თავისუფლება ევროპას დაფინანსებას, მაგრამ ევროკავშირი ავტომატურად ვერ აიღებს თავის თავზე მის დაფინანსებას.

რადიო თავისუფალი ევროპა "იყო დემოკრატიის შუქურა და თან ძალიან ღირებული", — განაცხადა კალასმა, ესტონეთის ყოფილმა პრემიერ-მინისტრმა ბრიუსელში ჟურნალისტებს და აღნიშნა, რომ ეს საკითხი საგარეო საქმეთა მინისტრების შეხვედრაზე დაისვა.

"სამწუხაროა იმის მოსმენა, რომ აშშ ხსნის თავის დაფინანსებას. ახლა ჩვენთვის ჩნდება კითხვა, შეგვიძლია თუ არა ჩვენ დავიწყოთ მისი დაფინანსება, რათა შევავსოთ სიცარიელე, რომელსაც აშშ ტოვებს? ამ კითხვაზე პასუხია… არა ავტომატურად",— თქვა მან და დასძინა, რომ ბლოკი "შეხედავს, რისი გაკეთება შეგვიძლია".

ამას გარდა, რადიო თავისუფლების ევროპული ბიუროს ხელმძღვანელის, რიკარდ იოზვიაკის თქმით, 17 მარტს EU-ს საგარეო საქმეთა მინისტრების შეხვედრაზე რადიო თავისუფლების დაფინანსების საკითხი განიხილეს, ამასთან დაკავშირებით ჩეხეთის პოზიციას ესტონეთმა, ლატვიამ, ლიტვამ და პოლონეთმა დაუჭირეს მხარი.

"დღეს EU-ს საგარეო საქმეთა მინისტრებმა RFE/RL განიხილეს. ესტონეთმა, ლატვიამ, ლიტვამ და პოლონეთმა ჩეხეთის მხარდაჭერა გამოხატეს", — წერს ოზვიაკი X-ზე.

ამავე თემაზე: