თეთრმა სახლმა გაავრცელა განცხადება სათაურით "რადიკალური ამერიკის ხმა", სადაც მაუწყებლისთვის დაფინანსების შემცირების მიზეზად რადიკალური პროპაგანდა დაასახელა.

თეთრი სახლის განცხადებაში ნათქვამია, რომ აშშ-ის პრეზიდენტის, დონალდ ტრამპის აღმასრულებელი ბრძანება რომელიც პარასკევს გამოქვეყნდა, უზრუნველყოფს, რომ გადასახადის გადამხდელები "აღარ წამოეგებიან რადიკალურ პროპაგანდას".

თეთრი სახლი ასევე მოჰყავს სხვადასხვა ჟურნალისტის განცხადებები, რომლებიც ამერიკის ხმას ადანაშაულებენ "თაღლითობაში", ტრამპის საწინააღმდეგო მასალების გავრცელებაში და ა.შ.

მანამდე ამერიკის ხმის დირექტორმა მაიკლ აბრამოვიცმა სოციალურ ქსელში დაწერა, რომ ის ადმინისტრაციულ შვებულებაში გაუშვეს "ფაქტობრივად მთელ პერსონალთან" — 1300 კაცთან ერთად.

"ღრმად დამწუხრებული ვარ, რომ 83 წლის შემდეგ პირველად, ლეგენდარული ამერიკის ხმა დაადუმეს. დილით შევიტყვე, რომ ამერიკის ხმის მთელი პერსონალი – 1 300-ზე მეტი ჟურნალისტი, პროდიუსერი და დამხმარე პერსონალი დღეს ადმინისტრაციულ შვებულებაში გაგზავნეს. ისევე როგორც მე.

ამერიკის ხმას სჭირდება გააზრებული რეფორმა და ამ მიმართულებით გარკვეულ პროგრესს მივაღწიეთ. მაგრამ დღევანდელი ქმედება ამერიკის ხმას არ მისცემს საშუალებას, განახორციელოს თავისი სასიცოცხლო მისია. ეს მისია განსაკუთრებით მნიშვნელოვანია დღეს, როდესაც ამერიკის მეტოქეები, როგორებიც არიან ირანი, ჩინეთი და რუსეთი, მილიარდობით დოლარს ხარჯავენ ყალბი ნარატივების შესაქმნელად, რათა შეარყიონ შეერთებული შტატების რეპუტაცია.

ამერიკის ხმა ხელს უწყობს თავისუფლებისა და დემოკრატიის გავრცელებას მთელ მსოფლიოში ამერიკის ისტორიის თხრობითა და ობიექტური და დაბალანსებული ახალი ამბებისა და ინფორმაციის მიწოდებით, განსაკუთრებით მათთვის, ვინც ტირანიის პირობებში ცხოვრობს. მაშინაც კი, თუ ის რაიმე ფორმით გადარჩება, ადმინისტრაციის მიერ დღეს განხორციელებული ქმედებები მნიშვნელოვნად დააზიანებს ამერიკის ხმის უნარს, ხელი შეუწყოს უსაფრთხო და თავისუფალი სამყაროს ჩამოყალიბებას და, შესაბამისად, ვეღარ უზრუნველყოფს აშშ-ის ინტერესების დაცვას.

80 წელზე მეტი ხნის განმავლობაში ამერიკის ხმა იყო შეერთებული შტატების ფასდაუდებელი აქტივი, რომელიც მნიშვნელოვან როლს ასრულებდა კომუნიზმის, ფაშიზმისა და ჩაგვრის წინააღმდეგ ბრძოლაში, ასევე თავისუფლებისა და დემოკრატიისთვის ბრძოლაში მთელ მსოფლიოში. დღესდღეობით ამერიკის ხმა ყოველკვირეულად 360 მილიონზე მეტ ადამიანთან აღწევს, 48 ენაზე. ბევრ დიქტატურაში ამერიკის ხმა ხშირად ახალი ამბებისა და ინფორმაციის ერთადერთი სანდო წყაროა.

მივესალმები ამერიკის ხმის შესანიშნავ თანამშრომლებს. მათგან ბევრი ამერიკაში ავტორიტარული ქვეყნებიდან ჩამოვიდა, სადაც მათ არ შეეძლოთ ჟურნალისტური საქმიანობის თავისუფლად განხორციელება. შთამაგონებელია, იყო მათი ლიდერი და ისინი ჩემგან იმსახურებენ ღრმა პატივისცემასა და მადლიერებას თავისუფლებისა და დემოკრატიის წინსვლაში შეტანილი წვლილისთვის", — ნათქვამია მაიკლ აბრამოვიცის განცხადებაში.

განცხადება მას შემდეგ გაკეთდა, რაც აშშ-ს პრეზიდენტმა დონალდ ტრამპმა ხელი მოაწერა აღმასრულებელ ბრძანებას ამერიკის ხმის მშობელი სააგენტოს დახურვის შესახებ.

ტრამპმა სააგენტო USAGM-ის შემცირების ბრძანება გასცა, რომელიც რადიო თავისუფლებას და ამერიკის ხმას კურირებს. მსმენელების თქმით, ამერიკის ხმის ზოგიერთმა რადიოსადგურმა, რომელიც ადგილობრივ ენებზე მაუწყებლობს, ახალი ამბების მაუწყებლობა შეწყვიტა .

ამერიკის ხმის მთავარ რედაქტორებსაც კი მიეცათ ბრძანება, შეწყვიტონ მუშაობა, ამიტომ თანამშრომლები მოელიან, რომ მთელ მსოფლიოში ახალი ამბების გაშუქება შეწყდება.

ამერიკის ხმა შეერთებული შტატების გლობალური მედიის სააგენტოს (USAGM) ნაწილია, რომელიც ასევე მართავს რადიო თავისუფალ ევროპას, რადიო თავისუფალ აზიასა და ახლო აღმოსავლეთის სამაუწყებლო ქსელებს.

მანამდე აშშ-ის პრეზიდენტმა ხელი მოაწერა აღმასრულებელ ბრძანებას შვიდი სააგენტოს, მათ შორის გლობალური მედიის სააგენტოს (USAGM) საქმიანობის შეწყვეტის შესახებ.