აშშ-ის ეროვნული დაზვერვის დირექტორი ტულსი გაბარდი უკრაინისთვის სადაზვერვო ინფორმაციის მიწოდების განახლებას ადასტურებს.

"აშშ-ის პრეზიდენტის ხელმძღვანელობის დამსახურებით, უკრაინაში სისხლიანი ომის დასრულებას ერთი მნიშვნელოვანი ნაბიჯით მივუახლოვდით. პრეზიდენტის ბრძანების თანახმად, უკრაინასთან დაზვერვის გაზიარების პაუზა დასრულდა", — წერს ტულსი გაბარდი X-ზე.

შეგახსენებთ, რომ გუშინ 11 მარტს, ერ-რიადიში უკრაინაში ომის შეწყვეტასთან დაკავშირებით აშშ-უკრაინის მხარეების მორიგი შეხვედრა გაიმართა.

შეხვედრის შემდეგ მხარეების მიერ გავრცელებულ ერთობლივ განცხადებაში ნათქვამია, რომ აშშ დაუყოვნებლივ მოხსნის პაუზას უკრაინისათვის სადაზვერვო ინფორმაციის მიწოდებაზე და ამ მიმართულებით სრულყოფილ თანამშრომლობას განაგრძობს.

ამასთან, უკრაინამ გამოთქვა მზაობა, დაუყოვნებლივ მოაწეროს ხელი 30-დღიან ცეცხლის შეწყვეტის შეთანხმებას, რომელიც მხარეთა შეთანხმებით შესაძლოა გაგრძელდეს. მისი ამოქმედება კი რუსეთის ფედერაციის თანხმობაზეა დამოკიდებული.

დელეგაციებმა განიხილეს ჰუმანიტარული საკითხებიც, კერძოდ, ცეცხლის შეწყვეტის პირობებში ტყვეთა გაცვლისა და გატაცებული უკრაინელი ბავშვების უკან დაბრუნების საკითხები.

ორივე დელეგაცია თანახმაა, დაასახელოს მოლაპარაკებაში ჩართული გუნდები და დაიწყოს მუშაობა მშვიდობაზე, რომელიც უკრაინას ხანგრძლივ უსაფრთხოებას მოუტანს.

ბოლოს, ორივე ქვეყნის პრეზიდენტი მზადაა, ხელი მოაწეროს შეთანხმებას უკრაინის კრიტიკული მინერალების რესურსების განვითარების შესახებ, აშშ-ის პარტნიორობით ქვეყნის ეკონომიკის გასაფართოებლად და უკრაინის ხანგრძლივი მშვიდობის უზრუნველსაყოფად.

ამავე თემაზე:

აშშ-უკრაინის მოლაპარაკებებს საფრანგეთის, პოლონეთის, დიდი ბრიტანეთის ლიდერები და EU-ს უმაღლესი წარმომადგენლები ეხმაურებიან

როდის გაიმართება აშშ-რუსეთის მოლაპარაკებები უკრაინის ომზე და რა პირობებს აყენებდა პუტინი თვენახევრის წინ?

ზელენსკი: უკრაინა მზადაა, მიიღოს ცეცხლის შეწყვეტის წინადადება, ახლა აშშ-ს გადასაწყვეტია, დაარწმუნოს რუსეთი, იგივე გააკეთოს

ტრამპი ზელენსკის კვლავ იწვევს თეთრ სახლში

აშშ დაუყოვნებლივ განაახლებს უკრაინისათვის სადაზვერვო ინფორმაციის გაზიარებას — მოლაპარაკებების შედეგები ცნობილია