სასამართლომ საპროტესტო აქციებზე დაკავებული 8 პირი: ზვიად ცეცხლაძე, ვეფხია კასრაძე, ვასილ კაძელაშვილი, გიორგი გორგაძე, ირაკლი მიმინოშვილი, ინსაფ ალიევი, თორნიკე გოშაძე და ნიკოლოზ ჯავახიშვილი პატიმრობაში დატოვა.

მოსამართლე დავით მგელიაშვილმა დააკმაყოფილა პროკურატურის მოთხოვნა მათი პატიმრობაში დატოვებასთან დაკავშირებით, რომელიც "სასჯელის თავიდან აცილების მიზნით მიმალვისა და ახალი დანაშაულის ჩადენის" თავიდან არიდებით აიხსნა.

დაცვის მხარე პატიმრობის ძალაში დატოვებას არ ეთანხმებოდა და მათ გათავისუფლებას ითხოვდა.

ზვიად ცეცხლაძეს, ვეფხია კასრაძესა და ვასილ კაძელაშვილს ბრალად ედებათ ჯგუფური ძალადობის ორგანიზება და ხელმძღვანელობა, რაც სასჯელის სახედ 6-დან 9-წლამდე თავისუფლების აღკვეთას ითვალისწინებს.

გიორგი გორგაძეს, ირაკლი მიმინოშვილს, ინსაფ ალიევს, თორნიკე გოშაძეს და ნიკოლოზ ჯავახიშვილს ბრალად ედებათ ჯგუფურ ძალადობაში მონაწილეობა — მათ 4-დან 6-წლამდე პატიმრობა ემუქრებათ.