პოლონეთმა კრაკოვიდან საქართველოში სამხედრო თვითმფრინავით 17 ქართველი არალეგალი გამოაძევა.

პოლონური მხარის ცნობით, დეპორტირებულთა შორის არიან კრიმინალური წარსულის მქონე პირები, რომლებიც პოლონეთის ტერიტორიაზე ქურდობდნენ.

ქართველების გამოძევებას X-ზე პოსტი მიუძღვნა პოლონეთის პრემიერმა, დონალდ ტუსკმაც — პოსტში ვკითხულობთ, რომ პოლონეთმა "ქართული ბანდების დაშლა დაიწყო".

"დეპორტაციები დაიწყო. ჩვენ ფაქტობრივად ვშლით ქართულ ბანდებს. სიტყვები კი არა, ქმედებები", — წერს დონალდ ტუსკი და ვიდეოს აქვეყნებს.

პოლონეთის შინაგან საქმეთა მინისტრმა ტომაშ სიემონიაკმა რამდენიმე დღის წინ დაადასტურა, რომ მძიმე დანაშაულის ჩამდენი უცხოეთის ქვეყნების მოქალაქეები პოლონეთიდან დეპორტირდებიან.

ასევე იხილეთ: პოლონეთი საქართველოს კანონდამრღვევი მოქალაქეების დეპორტაციას იწყებს