დღეს, 4 მარტს ქართული ოცნების პარლამენტმა პირველი მოსმენით არაერთ საკანონმდებლო ცვლილებას დაუჭირა მხარი, რომელთა მიზანიც მედიისა და სამოქალაქო საზოგადოების გამოხატვის თავისუფლების შეზღდუვაა. ეს ცვლილებებია:

1. "უცხოური აგენტების რეგისტრაციის აქტი" — ე.წ FARA;

2. სისხლის სამართლის კანონმდებლობაში "სამშობლოს ღალატის" მუხლის დაბრუნება;

3. კანონპროექტი, რომელიც ტელე-რადიო მაუწყებლობაში რიგ აკრძალვებსა და შეზღუდვებს შემოიტანს;

4. საკანონმდებლო სივრციდან ტერმინი "გენდერის" ამოღება და "გენდერული თანასწორობის საბჭოების" გაუქმება;

5. ცვლილებათა პაკეტს, რომლის ამოქმედების შედეგადაც, არასამთავრობო ორგანიზაციები საჯარო გადაწყვეტილებების მიღების პროცესში ჩართული აღარ იქნებიან.

"უცხოური აგენტების რეგისტრაციის აქტის" (FARA) კანონპროექტი 24 თებერვალს გამოქვეყნდა, თუმცა, გამოქვეყნებული ტექსტში გამოყენებულია ტერმინები, როგორებიცაა "აშშ-ის პრეზიდენტი", "სახელმწიფო დეპარტამენტი", "ხაზინის მდივანი" და ა.შ.

კანონპროექტის ერთ-ერთმა ინიციატორმა, არჩილ გორდულაძემ, წარდგენის დროს განაცხადა, რომ დაინიცირებული კანონპროექტი დეტალური თარგმანია და მას ქართულ რეალობას მოარგებენ — გუშინ გორდულაძემ განაცხადა, რომ FARA-ს აღსრულებაზე პასუხისმგებელი ანტიკორუფციული ბიურო იქნება.

FARA გავრცელდება ყველა ფიზიკურ თუ იურიდიულ პირზე, რომლებიც "იღებენ უცხოეთიდან დაფინანსებას, ან მოქმედებენ უცხოური ძალის, უცხოური პრინციპალის დავალებებით, დამოკიდებულები არიან მათ დავალებაზე და ჩართულები არიან პოლიტიკურ აქტივობებში".

რაც შეეხება "მაუწყებლობის შესახებ" კანონებს, ოცნებამ პირველი მოსმენით ორი პროექტი მიიღო. პირველი პროექტის გათვალისწინებით, "მაუწყებლობის შესახებ" კანონს ემატება ნორმები, რომელთა თანახმადაც, აიკრძალება მაუწყებლის მიერ უცხოური ძალისგან პირდაპირი ან არაპირდაპირი დაფინანსების — ფულადი თანხის ან ქონებრივი ღირებულების სხვა სახის მატერიალური სიკეთის მიღება.

რაც შეეხება მეორე პროექტს, მისი მიღების შედეგად, კომუნიკაციების მარეგულირებელ კომისიას ტელევიზიებისა და რადიოების გაფრთხილება და დაჯარიმება შეეძლება იმ შემთხვევაში, თუ ისინი ახალი ამბების გაშუქების დროს "სამართლიანობისა და მიუკერძოებლობის" პრინციპებს არ დაიცავენ; ახალ ამბებში საკითხის გაშუქების დროს არ დაიცავენ ბალანსს; წინასწარი გაფრთხილების გარეშე, ეთერში გაშვების მიზნით ჩაწერენ ინტერვიუს ან სატელეფონო საუბარს; სასწავლო დაწესებულებაში, საავადმყოფოში, სასჯელაღსრულების დაწესებულებაში, პოლიციის განყოფილებაში ან სასწრაფო დახმარების მანქანაში მასალის გადაღების დროს არ ექნებათ წინასწარი თანხმობა როგორც უფლებამოსილი პირის, ისე იმ ადამიანების, რომლებსაც იღებენ და ა.შ.

რაც შეეხება "სამშობლოს ღალატის" მუხლს, ის სისხლის სამართლის კოდექსს 307¹ მუხლად დაემატება.