გუშინ ლოს-ანჯელესში კინოსამყაროს ყველაზე მნიშვნელოვანი დაჯილდოება, რიგით 97-ე ოსკარების ცერემონია ჩატარდა, სადაც მაყურებელთა უმრავლესობის მოლოდინების საპირისპიროდ, შონ ბეიკერის ანორამ 5 ოსკარი მოიგო. ნამუშევარმა საუკეთესო ფილმის, საუკეთესო სცენარისა საუკეთესო მონტაჟის ნომინაციებში გაიმარჯვა. ანორაში მონაწილეობისათვის მთავარი როლის შემსრულებელი საუკეთესო მსახიობი ქალის ტიტული მოიპოვა მაიკი მედისონმა, შონ ბეიკერმა კი — საუკეთესო რეჟისორის. ერთი სიტყვით, ფილმმა ისტორია დაწერა — ბეიკერამდე ერთ ფილმში ამდენი ოსკარი არავის აუღია.

მიუხედავად ფილმის საერთაშორისო წარმატებისა, მაყურებელი კინოაკადემიის გადაწყვეტილებით უკმაყოფილოა. არა იმიტომ, რომ გამარჯვებას სხვა ფილმები უფრო იმსახურებდნენ — ეს ინდივიდუალური გემოვნების საკითხია. არამედ იმიტომ, რომ ფილმის მსახიობები მჭიდროდ არიან დაკავშირებული კრემლთან და რუსეთის იმპერიალისტური ზრახვების პროპაგანდისტებად მიიჩნევიან.

ვინაა იურა ბორისოვი?

იურა ბორისოვი რუსი მსახიობია, რომელიც ანორაში იგორის, ერთ-ერთი განსტერის როლს ასრულებს. კინოაკადემიის დაჯილდოებაზე ის მეორეხარისხოვანი როლის შემსრულებელი საუკეთესო მსახიობის კაცის ნომინაციაშიც იყო წარდგენილი.

ბორისოვმა რუსეთში სახელი პატრიოტულ ფილმებში მონაწილეობით გაითქვა. ერთ-ერთი ასეთი ფილმია AK-47, რომელშიც ბორისოვი მიხაილ კალაშნიკოვის როლს ასრულებს. ფილმი ყირიმის ანექსირებულ ტერიტორიაზეა გადაღებული, რის გამოც პროექტს საერთაშორისო კრიტიკა ხვდა წილად. მსახიობის ერთ-ერთი მთავარი როლია, ასევე, T-34-ში, საბჭოთა ტანკის შესახებ გადაღებულ ფილმში განსახიერებული ჯარისკაცის პერსონაჟი. ფილმი კრემლის დასპონსორებითაა გადაღებული.

მართალია, 2022 წელს რუსეთის არმიის უკრაინის ტერიტორიაზე შეჭრის შემდეგ ბორისოვს რუსულ პროპაგანდისტულ ფილმებში მონაწილეობა აღარ მიუღია, თუმცა, დასავლეთში მოღვაწეობის პარალელურად, ის უკრაინისადმი აგრესიას არ გმობს და რუსეთში კრემლის პოლიტიკის მხარდამჭერ პოპულარულ სახედ მიიჩნევა, რომლის საერთაშორისო წარმატებას კრემლის საზოგადოებასთან ურთიერთობის სამსახური "დასავლეთის მიერ აღმართული კულტურული კედლის" ნგრევას უწოდებს და ტაშს უკრავს.

"ყველა იურაზე საუბრობს," — ამბობს The New York Times-თან კატია მწითურიძე, მოსკოველი კინოკრიტიკოსი და Variety Russia-ს ყოფილი მთავარი რედაქტორი — "შონ ბეიკერი თითქმის რუს რეჟისორადაა აღქმული. ამ ფილმში რუსები კარგები და გულწრფელები არიან — ჭეშმარიტი ჩეხოვის პერსონაჟები."

ბორისოვის ოსკარის ნომინაცია რუსეთში ხმამაღლა აღნიშნეს. ერთ-ერთი ცნობილი სახე, რომელმაც ანორას ვარსკვლავს წარმატება მიულოცა, ქართული წარმოშობის რუსი პროპაგანდისტი და მედია კონგლომერატის, Gazprom Media-ს თავმჯდომარე, თინა კანდელაკია. "გილოცავ ნომინაციაზე წარდგენას. ჯერ დაელოდე, იურა! ყველაზე დიდი პრემიერები წინ გელოდება," — დაწერა კანდელაკმა, რომელიც აშშ-ს მიერ სანქცირებული პირია და პუტინის ჯარის მიერ უკრაინაში შეჭრას ხმამაღლა უჭერს მხარს.

ბორისოვი ანორას ქასთის ერთადერთი რუსი მსახიობი არაა. ფილმის ერთ-ერთ ცენტრალურ პერსონაჟს განასახიერებს მარკ აიდელშტაინი, რომელმაც პოპულარობა რუსულ ფილმში საშას ქვეყანა მონაწილეობის შემდეგ მოიპოვა. ეკრანებზე 2022 წელს გამოსული ფილმი დიდწილად ოკუპირებული ყირიმის ტერიტორიაზეა გადაღებული და რუსული დამპყრობლური პოლიტიკის პროპაგანდისტულ ნარატივს ავრცელებს. ფილმი Central Partnership-ის მიერაა დასპონსორებული, რომელიც რუსული გაზის სახელმწიფო კომპანიის, გაზპრომის მფლობელობაში შედის და საერთაშორისო სანქციები აქვს დაწესებული.

Telegraph-ის ინფორმაციით, ჰოლივუდში მიღწეული წარმატებების მიუხედავად, აიდელშტაინი და ბორისოვი რუსულ პროექტებში მონაწილეობას აგრძელებენ. მსახიობების წარსულისა და კრემლის პოლიტიკის აქტიური მხარდაჭერის გამო, უკრაინელი და უკრაინის მხარდამჭერი აქტივისტები კინოაკადემიას გულგრილობაში ადანაშაულებენ. კინოკრიტიკოსებისა და მაყურებლის აზრით, ანორა, რომელიც რუსი ოლიგარქის შვილზე მოგვითხრობს, ოლიგარქიას რომანტიკული პერსპექტივიდან გვიჩვენებს და მის დამანგრეველ ეფექტებს სრულიად აიგნორებს, ამიტომ ფილმის წარმატება კრემლის წისქვილზე ასხამს წყალს.

იხილეთ ასევე:

• ოსკარი 2025-ის გამარჯვებულები დასახელდნენ — ნახეთ სრული სია
• ამბიცია და მსხვერპლი — რატომ უნდა უყუროთ The Brutalist-ს?
• "ეგ არ ძვრება-მეთქი" — The Brutalist-ის ვიზაჟისტს ედრიენ ბროუდის ცხვირი გრიმის ნაწილი ჰგონებია