გრიმი მხატვრული ფილმის შექმნის პროცესის უმნიშვნელოვანესი ნაწილია. ის არა მხოლოდ პერსონაჟის ვიზუალურ მხარეს გამოკვეთს, ეხმარება კიდეც მსახიობს როლის გათავისებაში. თუმცა, ზოგჯერ ფილმის ვიზაჟისტსაც შეიძლება შეცდომა მოუვიდეს...

წლევანდელი ოსკარის ნომინანტი ფილმის, The Brutalist-ის, ვარსკვლავმა ედრიენ ბროუდიმ გადაღებებიდან ერთი სახალისო ისტორია გაიხსენა. ჯიმი ფელონის შოუში სტუმრობისას, ამერიკელი მსახიობი მოჰყვა, როგორი მონდომებით ცდილობდა ფილმის ვიზაჟისტი, მისი ნამდვილი ცხვირი "მოეხსნა".

"მთელი გულმოდგინებით მუშაობდა წებოს მოსაცილებლით, როცა ვკითხე, მაგის [ცხვირის] მოხსნას ცდილობ-მეთქი?", — იხსენებს ბროუდი, — "კიო, მიპასუხა. ეგ არ ძვრება-მეთქი".

კინოვარსკვლავის თქმით, დარცხვენილმა ვიზაჟისტმა მოგვიანებით მოუბოდიშა და უთხრა, რომ ამ შემთხვევას თავის დღიურში ჩაწერდა.

ბრუტალისტში ბროუდი მთავარ როლს ასრულებს და ასახიერებს გამოგონილ არქიტექტორს, უნგრელ ებრაელ ლასლო ტოტს, რომელიც ჰოლოკოსტს გადაურჩება და აშშ-ში "ამერიკული ოცნების" ასახდენად გაემგზავრება. ფილმში ბროუდის სახასიათო გარეგნობაზე რამდენჯერმეა ხაზი გასმული და აღნიშნულია, რომ ცხვირი პერსონაჟმა საკონცენტრაციო ბანაკში გაიტეხა. თუმცა, რეალობაში მსახიობმა ცხვირი სამჯერ გაიტეხა, მათგან ერთ-ერთი შემთხვევა კი სპაიკ ლის 1999 წლის ფილმს Summer of Sam და ჩხუბის სცენის გადაღებას უკავშირდება.

ბრუტალისტი, ბრედი კორბეის ისტორიული დრამა, წლევანდელ ოსკარზე 10 ნომინაციაშია წარდგენილი, მათ შორის, საუკეთესო რეჟისორისა და საუკეთესო ფილმის კატეგორიებში. ოსკარის ერთ-ერთ მთავარ პრეტენდენტად მოიაზრება ბროუდიც, რომელმაც ფილმში შესრულებული როლისთვის ოქროს გლობუსი მოიპოვა.

თუმცა, ამერიკული კინოინსტიტუტის მიერ 2024 წლის 10 საუკეთესო ფილმს შორის დასახელებულმა ბრუტალისტმა კრიტიკაც დაიმსახურა ხელოვნური ინტელექტის გამოყენების გამო.

ფოტო: Universal Pictures

აღსანიშნავია, რომ გრიმიორები ხელოვნურ ცხვირს ხშირად იყენებენ ფილმებში ისტორიული ფიგურების უკეთ წარმოსაჩენად. მაგალითად, ცხვირის პროთეზი ეკეთა მერილ სტრიპს, როცა ფილმში რკინის ლედი მარგარეტ თეტჩერი განასახიერა (და ოსკარიც დაიმსახურა). ოსკარი მიიღო ნიკოლ კიდმანმაც, რომელმაც ვირჯინია ვულფზე გადაღებულ ბიოგრაფიულ ფილმში საათები ასევე ხელოვნური ცხვირი მოირგო. მაშინ ჯილდოს წარმდგენმა დენზელ ვაშინგტონმა იხუმრა კიდეც, კიდმანმა ოსკარი ცხვირით მოიგოო.

რიგ შემთხვევაში გრიმის ეს ნაწილი საკამათოდაც მიიჩნევა ხოლმე. მაგალითად, მწვავე კრიტიკა მოჰყვა ბრედლი კუპერის მიერ ცხვირის პროთეზის გამოყენებას ამერიკელ ებრაელ კომპოზიტორზე, ლენარდ ბერნსტაინზე, გადაღებულ ფილმში მაესტრო. ფილმის შემოქმედებითი გუნდი მაშინ ანტისემიტიზმსა და ებრაელების სტერეოტიპულად წარმოჩენაში დაადანაშაულეს.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...