კინოაკადემიის რიგით 97-ე დაჯილდოებაზე საუკეთესო დოკუმენტური ფილმის ნომინაციაში ფილმმა No Other Land გაიმარჯვა. კინოსამყაროს ყველაზე მნიშვნელოვან სცენაზე, რომელსაც მსოფლიოს თითქმის ყველა ქვეყანაში პირდაპირი ტრანსლაციით ასობით მილიონი ადამიანი უყურებს, ოსკარის ასაღებად რეჟისორები იუვალ აბრაამი, ბაზელ ადრა, ჰამდან ბალალი და რეიჩერ სზორი ავიდნენ და ღაზაში მიმდინარე კონფლიქტზე მსოფლიოს მიმართეს.

"მსოფლიოს მოვუწოდებთ, რომ პალესტინელი ხალხის ეთნიკური წმენდისა და უსამართლობის შესაჩერებლად სერიოზული ნაბიჯები გადადგან," – თქვა ადრამ, პალესტინელმა ჟურნალისტმა და აქტივისტმა — "ორი თვის წინ მამა გავხდი და ვიმედოვნებ, რომ ჩემს ქალიშვილს იმავე ცხოვრების გამოვლა არ მოუწევს, როგორც მე. No Other Land იმ მძიმე რეალობას ასახავს, რასაც უკვე ათწლეულებია ვუძლებთ და მაინც არ ვნებდებით."

აბრაამმა, ისრაელელმა ჟურნალისტმა, იმაზე ისაუბრა, თუ რატომ იყო ეს ფილმი ისრაელელებსა და პალესტინელებს შორის კოლაბორაცია. "ეს ფილმი ჩვენ, პალესტინელებმა და ისრაელელებმა გადავიღეთ, რადგან ერთად, ჩვენი ხმები უფრო ძლიერად ისმის. ჩვენ ერთმანეთს ვხედავთ, ვუყურებთ ღაზას და მისი ხალხის განადგურებას, რაც აუცილებლად უნდა შეწყდეს. 7 ოქტომბერს ძალადობრივად შეპყრობილი ისრაელელი მძევლები აუცილებლად უნდა გათავისუფლდნენ," — თქვა აბრაამმა.

No Other Land ისრაელელ-პალესტინელთა კოლექტივმა შექმნა. დოკუმენტური ფილმი პალესტინელი ოჯახის ცხოვრებას გვიჩვენებს, რომელიც ისრაელის მთავრობამ ღაზას დასავლეთ სანაპიროდან გადაასახლა. ფილმის გადაღებისას და ღაზაში მიმდინარე ნგრევისა და სიკვდილის ფონზე, ბაზელ ადრა და იუველ აბრაამი მოულოდნელად დამეგობრდნენ.

თავის გამოსვლაში იუველ აბრაამმა ისიც აღნიშნა, რომ მას და ადრას "უთანასწორო" ცხოვრებები აქვთ. "ჩვენ ისეთ რეჟიმში ვცხოვრობთ, სადაც მე სამოქალაქო კანონებით თავისუფალი ვარ, ბაზელი კი სამხედრო კანონების ქვეშ ცხოვრობს, რომლებიც მის ცხოვრებას ანადგურებს, ის კი ვერაფერს აკეთებს. სხვა გზას უნდა მივმართოთ, ვიპოვოთ პოლიტიკური გამოსავალი ეთნიკური უპირატესობის გარეშე, ორივე ერის ეროვნული უფლებების დაცვით."

აბრაამმა ამერიკის შეერთებული შტატების საერთაშორისო პოლიტიკაზეც ისაუბრა და თქვა, რომ პრეზიდენტი ტრამპის ხედვა ამ გზას ბლოკავს.

"რატომ ვერ ხედავთ, რომ ჩვენი ბედი გადაჯაჭვულია, რომ ჩემი ხალხი ნამდვილად უსაფრთხოდ მხოლოდ მაშინ იქნება, თუ ბაზელის ხალხიც თავისუფლად და უსაფრთხოდ იქნება?" — ჰკითხა აუდიტორიას აბრაამმა.

No Other Land-ის პრემიერა გასულ წელს ბერლინის კინოფესტივალზე შედგა. ფილმმა ჟიურისა და აუდიტორიის მთავარი პრიზები დაიმსახურა და წლის ერთ-ერთ ყველაზე მნიშვნელოვან დოკუმენტურ ნამუშევრად იქცა.