თეთრი სახლის ოვალურ კაბინეტში ვოლოდიმირ ზელენსკისა და დონალდ ტრამპს შორის 28 თებერვალს მომხდარ შელაპარაკებას გამოეხმაურა რუსეთის ფედერაციის საგარეო საქმეთა სამინისტროს პრესსპიკერი მარია ზახაროვაც.

აგრესორი ქვეყნის წარმომადგენელმა განაცხადა, რომ "ნეონაცისტური რეჟიმის ლიდერის ვ. ზელენსკის ვაშინგტონში ვიზიტი კიევის რეჟიმის სრულ პოლიტიკურ და დიპლომატიურ კრახს წარმოადგენს".

რუსეთის წარმომადგენელი დაეთანხმა დონალდ ტრამპს და განაცხადა, რომ ვოლოდიმირ ზელენსკი შეპყრობილია ომის გაგრძელებით, ხოლო რუსეთს მშვიდობის დამყარება სურს იმ პირობებით, რომლებიც მისი დაწყებისას დააყენა.

"დღევანდელ პოლიტიკურ პირობებში, რომელიც კიევის რეჟიმისთვის სულ უფრო უარესდება, ამ ფიგურას პასუხისმგებლობის გრძნობის გამოვლენა არ შეუძლია და ამიტომ ის ომის გაგრძელებით არის შეპყრობილი, მშვიდობის უარყოფით, რაც მისთვის სიკვდილის ტოლფასია. როგორც აქამდე, ჩვენ გამოვდივართ იმ წინაპირობიდან, რომ ნამდვილი, სამართლიანი და მდგრადი მშვიდობა შესაძლებელია მხოლოდ იმ შემთხვევაში, თუ უკრაინის კრიზისის ძირითადი მიზეზები სრულად იქნება აღმოფხვრილი. შესაბამისად, უკრაინის დემილიტარიზაცია და დენაციფიკაცია, ისევე როგორც "ადგილზე" არსებული რეალობის აღიარება, რუსეთის უცვლელ მიზნებად რჩება. რაც უფრო მალე გააცნობიერებენ ამას კიევი და ცნობილი ევროპული დედაქალაქები, უკრაინის კრიზისის მშვიდობიანი გადაწყვეტა უფრო ახლოს იქნება", — განაცხადა რუსეთის საგარეო საქმეთა სამინისტროს პრესსპიკერმა.

ინფორმაციისთვის, 28 თებერვალს, აშშ-ის პრეზიდენტ დონალდ ტრამპსა და ვოლოდიმირ ზელენსკის შორის შეხვედრა თეთრი სახლის "ოვალურ კაბინეტში" შედგა. შეხვედრას ესწრებოდა ამერიკის ვიცეპრეზიდენტი ჯეი დი ვენსიც, რომელიც დებატებში არაერთხელ ჩაერთო.

შეხვედრა, რომელსაც აშშ-სა და უკრაინას შორის იშვიათი მინერალების შეთანხმების ხელმოწერა უნდა მოჰყოლოდა, სკანდალურად დასრულდა, მას შემდეგ, რაც ვოლოდიმირ ზელენსკიმ აშშ-ის პრეზიდენტთან და ჯეი დი ვენსთან ცხარედ იკამათა და თეთრი სახლი კომენტარის გარეშე დატოვა. აშშ-ის ვიცე პრეზიდენტმა ვოლოდიმირ ზელენსკის მადლიერების არ გამოხატვაში დასდო ბრალი, ხოლო დონალდ ტრამპმა კი უკრაინის პრეზიდენტი ომის გაგრძელების სურვილში დაადანაშაულა.

შეხვედრის შემდეგ თეთრმა სახლმა გაავრცელა ინფორმაცია, რომ ტრამპისა და ზელენსკის პრესკონფერენცია გადაიდო და "მინერალების შეთანხმებას" აშშ-სა და უკრაინას შორის ხელი არ მოეწერა.