2025 წლის მიწურულს, სავარაუდოდ, ევროკავშირი და ინდოეთი თავისუფალი ვაჭრობის შეთანხმებას გააფორმებენ.

Euronews-ის ცნობით, იმ პირობებში, როცა დონალდ ტრამპი ევროკავშირს პროდუქტებზე დამატებითი ტარიფებით ემუქრება, ევროკავშირი ახალი სავაჭრო პარტნიორების ძიებაშია — ერთ-ერთი ასეთი კი შესაძლოა, სწორედ ინდოეთი იყოს.

"ევროკავშირსა და ინდოეთს შორის თავისუფალი ვაჭრობის შეთანხმება შესაძლოა ამ სახის შეთანხმებებს შორის მსოფლიოში უდიდესი იყოს. სწორედ ამიტომ შევთანხმდით პრემიერმინისტრ მოდისთან, რომ ეს ამ წლის ბოლომდე შევძლოთ", — განაცხადა ევროკომისიის პრეზიდენტმა ურსულა ფონ დერ ლეიენმა.

მოკლე ვადაში თავისუფალი ვაჭრობის შეთანხმება განსაკუთრებით ამბიციური გეგმაა იმის გათვალისწინებით, რომ ევროკავშირსა და ინდოეთს შორის ამ საკითხზე მოლაპარაკებები 2007 წელს დაიწყო, ხოლო 2013-2022 წლებში შეჩერებული იყო.

მიუხედავად მაღალი ტარიფებისა, ევროკავშირი ინდოეთის ბაზარს პრიორიტეტულად მისი ზომის გამო თვლის — გარდა თავისუფალი ვაჭრობისა, იგეგმება ინვესტიციების შესახებ შეთანხმების დადებაც. მოლაპარაკებები განსაკუთრებით რთული სასოფლო-სამეურნეო პროდუქციის ნაწილში იქნება, რადგან ევროპელ ფერმერები არაევროპელი იმპორტიორებისგან კონკურენციას უფრთხიან — ეს პრობლემურია ინდოეთისთვისაც, რომელიც ძირითადად წარმოებაში მცირე მასშტაბის ფერმებს ეყრდნობა.