საიფორმაციო სააგენტო AP News წერს, რომ უკრაინის იშვიათ მინერალებზე წვდომის მიღება საფრანგეთსაც სურს და ამისათვის მოლაპარაკებებს უკვე რამდენიმე თვეა აწარმოებს — ამის შესახებ საფრანგეთის თავდაცვის მინისტრმა განცხადება დღეს, 27 თებერვალს გააკეთა.

უკრაინის პრეზიდენტი ვოლოდიმირ ზელენსკი 28 თებერვალს ვაშინგტონში ჩავა და ხელს მოაწერს აშშ-სა და უკრაინას შორის მიღწეულ ბუნებრივი რესურსების შესახებ შეთანხმებას, რომელმაც გასული რამდენიმე კვირის განმავლობაში ორი ქვეყნის ლიდერებს შორის ურთიერთობაც კი დაძაბა.

საფრანგეთის თავდაცვის მინისტრ სებასტიენ ლეკორნუს განცხადებით, ქვეყანა ცდილობს, საჭირო მინერალების მიწოდება დივერსიფიცირებული იყოს. მინისტრს არ დაუკონკრეტებია, რომელი იშვიათი ბუნებრივი რესურსის მიღების სურვილი აქვს საფრანგეთს, თუმცა თუ აშშ-ის მაგალითით ვიხელმძღვანელებთ, მინერალები, რომელთა მოპოვებაც შეერთებულ შტატებს სურს, ტექნოლოგიების, შეიარაღებისა და სამედიცინო აღჭურვილობის წარმოებისთვისაა აუცილებელი.

"ჩვენ ამ საკითხზე საფრანგეთის საჭიროებებიდან გამომდინარე ვსაუბრობთ. მე მაქვს თავდაცვის ინდუსტრია, რომელსაც დასჭირდება გარკვეული რაოდენობის ნედლი მასალები მომავალ წლებში. ჩვენ ამის დივერსიფიკაცია უნდა შევძლოთ. ემანუელ მაკრონმა მთხოვა, რომ ამ საკითხზე მოლაპარაკებები უკრაინელებთან დამეწყო, რასაც ოქტომბრიდან ვაკეთებ კიდეც", — განაცხადა ლეკორნუმ.

თავდაცვის მინისტრის განცხადებით, საფრანგეთს ამ მინერალების შესაძლო შეძენა სურს და არ ცდილობს, ამ გზით უკან დაიბრუნოს მილიარდები, რომელიც საფრანგეთმა უკრაინისათვის სამხედრო და ჰუმანიტარული დახმარების გასაწევად დახარჯა.