18 თებერვალს, ტვ პირველის ოპერატორის დაკავების ფაქტზე, ჟურნალისტებმა ოცნების დეპუტატებს მიმართეთ კითხვით: როგორ გავარჩიოთ გამტაცებელი პოლიციელისგან?

ვლადიმერ ბოჟაძე

ქართული ოცნების დეპუტატმა, ვლადიმერ ბოჟაძემ ჟურნალისტებს განუცხადა, რომ საქართველოში ადამიანებს არ იტაცებენ და პოლიციას უნდა ვენდოთ.

ბოჟაძეს თქმით, გატაცების შემთხვევაში გამტაცებელს უნდა ვკითხოთ, პოლიციელია თუ არა, შემდეგ 112-ში დაგარეკინებენ და გაგათავისუფლებენ. კითხვაზე — გამტაცებელსაც ხომ შეუძლია მოიტყუოს რომ პოლიციელია, ის ადასტურებს, რომ ეს შესაძლებელია.

"ჩვენს ქვეყანაში ადამიანებს არ იტაცებენ. უნდა კითხოთ გამტაცებელს, პოლიციელები არიან თუ არა. პოლიციას უნდა ენდოთ, თუ აღმოჩნდები გატაცებული, მერე მოითხოვთ 112-ში დარეკვას დაგარეკინებენ და გაგათავისუფლებენ,” — განაცხადა ვლადიმერ ბოჟაძემ.

გია ვოლსკი

ქართული ოცნების პარლამენტის ვიცე-სპიკერის, გია ვოლსკის თქმით, პოლიციელის და გამტაცებლის გარჩევა იმის მიხედვით მოხდება თუ სად აღმოჩნდება გატაცებული — სასაფლაოზე თუ საგამოძიებო ოთახში.

"გარჩევა როგორ ხდება იცი? სად აღმოჩნდება: აღმოჩნდება სასაფლაოზე, სადაც კლავენ, როგორც თქვენები [ნაციონალური მოძრაობა] კლავდნენ, თუ აღმოჩნდება დაკავების ადგილას, სადაც გამოძიების შესაბამისი პროცედურები მიმდინარეობს," — განაცხადა გია ვლოსკიმ.

რიმა ბერაძე

"გამტაცებელი ცუდი სიტყვაა" — განაცხადა ქართული ოცნების დეპუტატმა, რიმა ბერაძემ. დეპუტატის აზრით, თუ პოლიცია "წაიყვანს" მოქალაქეს, ე.ი ამის შესაბამისი გარემოებები არის.

"დაესხა ცუდი სიტყვაა, ალბათ რაღაცა დანაშაული იყო, ან დაუმორჩილებლობა, ან რაღაცა, არა მაქვს პასუხი, ამას თვითონ პოლიციელი გაარჩევს.

გამტაცებელი ცუდი სიტყვაა, ნუ ახსენებთ ამას - ნამდვილად არ ვიცი, არ მინახავს, გვიან დავბრუნდი სახლში.

თუ პოლიციამ წაიყვანა, ალბათ იყო ისეთი ქმედება, დაველოდოთ რას იტყვის შსს," —განაცხადა რიმა ბერაძემ.

შეგახსენებთ, საპროტესტო აქციიდან სახლში მიმავალი ტვ პირველის ოპერატორი ლაშა ჯიოშვილი 19 იანვრის ღამეს, თბილისში, ელბაქიძის დაღმართის მიმდებარე ტერიტორიაზე ნიღბიანმა პირებმა დააკავეს და მანქანაში ძალის გამოყენებით ჩასვეს.

"ვბრუნდებოდით სახლში, ქუჩა სრულიად ცარიელი იყო და დროშიანი ბიჭი მირბოდა, უკან მისდევდა სრულიად შავებში ჩაცმული 10 ადამიანი და მივხვდით, რომ რაღაც არ იყო რიგზე. მანქანასთან მიიმწყვდიეს, ეგრევე ჩამოვედით მანქანიდან და ჩავრთეთ ლაივი. რომ დაგვინახეთ ვიღებდით, ნიღბები გაიკეთეს," — ამბობს თვითმხილველი.

შინაგან საქმეთა სამინისტროს ინფორმაციით, ტვ პირველის ოპერატორი ლაშა ჯიოშვილი ადმინისტრაციული წესითაა დაკავებული.

ლაშა ჯიოშვილი ადმინისტრაციულ სამართალდარღვევათა კოდექსის 173-ე მუხლითაა დაკავებული, რაც სამართალდამცველისადმი დაუმორჩილებლობას გულისხმობს.

ასევე იხილეთ: