შინაგან საქმეთა სამინისტროს ინფორმაციით, ტვ პირველის ოპერატორი ლაშა ჯიოშვილი ადმინისტრაციული წესითაა დაკავებული.

ლაშა ჯიოშვილი ადმინისტრაციულ სამართალდარღვევათა კოდექსის 173-ე მუხლითაა დაკავებული, რაც სამართალდამცველისადმი დაუმორჩილებლობას გულისხმობს.

საპროტესტო აქციიდან მიმავალი ლაშა ჯიოშვილი 19 იანვრის ღამეს, თბილისში, ელბაქიძის დაღმართის მიმდებარე ტერიტორიიდან ნიღბიანმა პირებმა დააკავეს და მანქანაში ძალის გამოყენებით ჩასვეს.

პირები, რომლებმაც ლაშა ჯიოშვილი წაიყვანეს, პოლიციის მაიდენტიფიცირებელი ნიშნებით აღჭურვილი არ იყვნენ და ამის შესახებ მხოლოდ მას შემდეგ განაცხადეს, რაც აქციის სხვა მონაწილეებმა ვიდეოს გადაღება დაიწყეს.

მოგვიანებით, სახალხო დამცველმა ლევან იოსელიანმა ტვ პირველის ახალი ამბების სამსახურს აცნობა, რომ დაკავებული ოპერატორი ზაჰესის წინასწარი მოთავსების იზოლატორში მიიყვანეს.

ტვ პირველის ინფორმაციით, დაკავებულ ოპერატორს, ლაშა ჯიოშვილს ადვოკატი, თორნიკე მიგინეიშვილი მოინახულებს.

ადვოკატი იმედოვნებს, რომ მისი მოლოდინები არ გამართლდება და მას არაადამიანური მოპყრობის ნიშნები არ ექნება.

"დაგვიკავშირდა სახალხო დამცველის აპარატი და გვითხრა, რომ მიყვანილი ჰყავდათ ზაჰესში.

იმედი მაქვს ჩემი მოლოდინები არ გამართლდება და მას არ ექნება არაადამიანური მოპყრობის ნიშნები", — განაცხადა მიგინეიშვილმა.