პაატა ბურჭულაძე 12 თებერვალს, 70 წლის იუბილეზე რუსთაველის გამზირის გადაკეტვის გამო პოლიციამ დააჯარიმა.

"გუშინ ხალხმა მომილოცა და სიცოცხლე გამიმრავლა!

კიდევ ერთხელ დიდი მადლობა ყველას! ეტყობა გაუჭირდათ ამის გადატანა და ცოტა ხნის წინ, მავნებლებმაც მომილოცეს 5000 ლარიანი ჯარიმით! პოლიციელს, რომელსაც ეს დავალება უნდა შეესრულებინა ხელები უკანკალებდა, რა დღეში ჩააგდეს ქართული პოლიცია.

გზის გადაკეტვას მედავებიან, როცა მაგ დროს ხალხის მიერ მოწყობილ მსვლელობაზე ვიყავი და საერთოდ, არ ვყოფილვარ პარლამენტთან. კარგია, რომ ოპერის წინ სიმღერას ჯერ ვერ მიწუნებენ, საქართველოს ჰიმნის შესრულებაზეც დაგვაჯარიმებენ ალბათ მალე.

ამასაც გავუძლებთ! ბრძოლა ბოლომდე! თავისუფლება მზია ამაღლობელს და რეჟიმის ტყვეებს!", — წერს Facebook-ზე ქართველი საოპერო მომღერალი.

მსოფლიო დონის ქართველ საოპერო მომღერალს 12 თებერვალს 70 წელი შეუსრულდა, თუმცა, როგორც მან რამდენიმე დღის წინ განაცხადა, თბილისის ოპერისა და ბალეტის თეატრმა იუბილეს აღსანიშნავად დარბაზი არ დაუთმო.