"ქართული ოცნების" დეპუტატი, ირაკლი ზარქუა ვიდეოს ავრცელებს, სადაც ის და ვიქტორ სანიკიძე მოქალაქეებს ძველით ახალ წელს წინასწარ ულოცავენ და დღეს მომხდარ დაპირისპირებაზე საუბრობენ.

როგორც ზარქუა აღნიშნავს, მომხდარი ფაქტი საამაყო არ არის, თუმცა, როდესაც ოჯახს და ახლობლებს შეეხებიან, პასუხს ყოველთვის გასცემს.

"მინდა დამდეგი ახალი წელი მოგილოცოთ ჩემს საქართველოს, ჩემს მაგარ ხალხს, განსაკუთრებით "სამარგალოს" დიდი სიყვარულით. ჰო, რაღაც ინციდენტი მოხდა, არ არის ეს საამაყო, უბრალოდ, ერთი რამ უნდა ვიცოდეთ ყველამ-ქართველები ვართ, თავმოყვარე ერი, როდესაც ჩემს ოჯახს, ჩემს ახლობლებს ეხებიან, ყოველთვის პასუხი გვექნება და ასე გავცემთ ყოველთვის პასუხს. ეს არის და ეს", – აღნიშნავს ირაკლი ზარქუა.

ვიდეომიმართვაში ასევე საუბრობს დეპუტატი ვიქტორ სანიკიძე, რომელიც ჩხუბში მონაწილეობდა.

სანიკიძის განმარტებით, "უსამშობლოებს პასუხი ყოველთვის გაეცემათ".

"მადლობა გვერდში დგომისთვის, ყველაფერი კარგად არის. როგორც ირაკლიმ თქვა, ყოველთვის გაეცემა პასუხი ამ უსამშობლოებს, სადაც არ უნდა ვიყოთ. მადლობა კიდევ ერთხელ და ყველაფერი ძალიან კარგად იქნება", – განაცხადა სანიკიძემ.

შეგახსენებთ, ირაკლი ზარქუა და ვიქტორ სანიკიძე მოქალაქეს დღეს ფიზიკურად გაუსწორდნენ. ლაშა გაბიტაშვილმა სასტუმროში გადაღებული ვიდეო სოციალურ ქსელში გაავრცელა. "ფეისბუქის" პირდაპირ ეთერში ის ყვება, რომ სასტუმროში საუზმის დროს "ოცნების" წევრები მასთან მივარდნენ გუშინ მომხდარის გამო. ლაშა გაბიტაშვილმა გუშინ აბუ დაბიში პროტესტი გამოხატა "ოცნების" წევრების მიმართ და ვიდეოები სოციალურ ქსელში გაავრცელა.