"ისე მოხდა, რომ იზოლატორში თანაკვეთები გვქონდა. დეტალები საინტერესოა, მაგრამ უფრო ცნობისმოყვარეობის თემაა, ვიდრე მნიშვნელობა აქვს. გვქონდა მომენტები, როცა ერთ საკანში ვიყავით", — მოქალაქე ლაშა გაბიტაშვილი აბუ-დაბის ინციდენტს, სადაც ოცნების დეპუტატებთან — ირაკლი ზარქუასთან და ვიქტორ სანიკიძესთან, შელაპარაკება მოუვიდა და რასაც დეპუტატების მხრიდან თავდასხმა მოჰყვა, რადიო თავისუფლებასთან იხსენებს.

ლაშა გაბიტაშვილი ადასტურებს, რომ ოცნების წევრებს და მას ერთი და იგივე ბრალდება ჰქონდათ წარდგენილი და ჯარიმა დაეკისრათ. მისივე თქმით, ოცნების წევრები დიპლომატიური პასპორტით და დეპუტატის იმუნიტეტის სარგებლობას ცდილობდნენ, თუმცა არ გამოუვიდათ.

"მალევე წავედი პოლიციაში და მგონია, რომ ჩვენებას მივცემ და მალევე წამოვალ… რა როგორ განვითარდა დეტალებს ვერ ვისაუბრებ. აღმოჩნდა, რომ მეც იზოლატორში გადამიყვანეს. ტელეფონზე წვდომა აღარ მქონდა, ჩემი მეუღლე დარჩა მარტო.

მე მადლობელი ვარ აბუ-დაბის პოლიციის და სამართლის და რა კუთხით – არავის არ ვუწამებივარ, არავის არ უფურთხებია, არავის შეურაცხყოფა არ მოუყენებია…

მერე ისე მოხდა, რომ იზოლატორში თანაკვეთები გვქონდა. დეტალები საინტერესოა, მაგრამ უფრო ცნობისმოყვარეობის თემაა, ვიდრე მნიშვნელობა აქვს. გვქონდა მომენტები, როცა ერთ საკანში ვიყავით. იზოლატორი საერთო განთავსებისაა, მე ცალკე ვიყავი, სადაც ბევრი ადამიანი იყო, თუმცა თანაკვეთა გვქონდა.

მე თავიდანვე ავუხსენი, რომ მათთან პირადული არაფერი მქონდა და არც თვითმიზანი მქონდა, რომ ისინი ციხეში ჩამესვა, მაგრამ როცა ვერ აღიქვამ და ისმენ შენი მოქალაქეების ხმას, ხდება ქვეყანაში წამება და უსამართლობა და ამ ყველაფრის ფონზე "ქოლდფლეის" კონცერტზე ხარ, ეს არის პრობლემა. კიდევ ბევრი რამე ვუთხარი…

თვითონ რა უნდა ეთქვათ, არ ვიცი, რაც საქართველოში ჩამოვიდნენ, რას ამბობენ ამაზე, ვერაფერს… თავიდანვე ავუხსენი, რომ ირაკლი ზარქუას დაწყებული იყო ეს, შეურაცხყოფა მან მომაყენა, როცა მე შეკითხვა დავსვი. როცა მოეხსნათ იმუნიტეტი და გარეთ დარჩათ ძალაუფლება და კავშირები, ჩვენ მშვიდად შეგვეძლო საუბარი. მე ველაპარაკებოდი, მაგრამ სასაუბრო რა გვქონდა? ისინი დიდად არ გვპასუხობდნენ. ჩემი თხოვნა და მოთხოვნა იყო, რომ დაკავებულების საქმეებს გასცნობოდნენ, თუმცა ამის პირობა არ მიმიღია", – განაცხადა ლაშა გაბიტაშვილმა რადიო თავისუფლებასთან.

ირაკლი ზარქუამ ამ ინციდენტის შესახებ კომენტარი აბუ-დაბიდან დაბრუნების შემდეგ — 23 იანვარს გააკეთა.

მისი თქმით, "ის რაც მოხდა, საამაყო არ არის, მაგრამ ოჯახის, შვილების, ცოლის შეურაცხყოფაზე, მიუხედავად თმენის ვალდებულებისა, ყოველთვის ასეთი რეაგირება ექნებათ, რადგან კაცები არიან და ქართველები არიან".

რაც შეეხება დაკავება-გათავისუფლების დეტალებს, ზარქუამ თქვა, რომ აბუ-დაბის საპატიმროს დატოვების საშუალება ჯარიმის გადახდის შემდეგ მიეცათ.

"იყო სასამართლო, ჯარიმა და ჯარიმის საფუძველზე შემდეგ მოგვეცა შესაძლებლობა, დაგვეტოვებინა აბუ-დაბი. ამ 3 და 4 ათას დოლარს, ბუნებრივია, ჩვენ გადავიხდით", – თქვა ზარქუამ.

შეგახსენებთ, რომ 13 იანვარს, აბუ-დაბიში, ქართული ოცნების დეპუტატები ირაკლი ზარქუა, ვიქტორ სანიკიძე და გელა სამხარაული მოქალაქე ლაშა გაბიტაშვილს ფიზიკურად დაუპირისპირდნენ.