აღიარებას კი არ ვთხოვდი, ოკმელას მაგალითი ვუთხარი, — აცხადებს ადვოკატი დავით გამყრელიძე და ადვოკატ გუჯა ავსაჯანიშვილის მიერ გავრცელებულ ინფორმაციას ადასტურებს იმის შესახებ, რომ დღეს ნიკოლოზ ჯავახიშვილთან ადვოკატი, ოჯახთან შეთანხმების გარეშე, იმყოფებოდა და დანაშაულის აღიარებს სთხოვდა.

"ვკითხე მე მას, გყავს-მეთქი ახლა ადვოკატი. უპატრონოდ ხომ არა ხარ? ომარმა ეგ მთხოვა ზუსტად, გაარკვიე რა დღეშიაო, იმიტომ რომ შიმშილობდა ეს ადამიანი, ხომ, როგორც ვიცი. აღიარებას კი არ ვთხოვდი, ოკმელას მაგალითი ვუთხარი აგერ რა. ისე არ მოხდეს და კარგად გაიაზრე ეს ყველაფერი-თქო რა, რა ჯობია, ახლა გარეთ სიტყვაზე იყო და გარედან იბრძოლო ადამიანმა, თუ რაღაც "ხლაპუშკა" გაისროლე თუ ჯებირს ჩაარტყი, ნაწილობრივ თქვა ის, რაც გააკეთე და ვიდეომასალაში ჩანს. მე რჩევასაც ვერ მივცემ მაგას იმიტომ, რომ არა ვარ მისი უფლებადამცველი. მას ჰყოლია ადვოკატი, თვითონ მითხრა მერე საუბარში. ვიღაცა ელგუჯაზე მითხრა, მე არ ვიცნობ ამ ელგუჯას," — აცხადებს დავით გამყრელიძე მთავართან.

გუჯა ავსაჯანიშვილმა ამ თემასთან დაკავშირებით ნიკოლოზ ჯავახიშვილის წერილიც გაავრცელა, სადაც წერია, რომ ნიკოლოზ ჯავახიშვილთან "ვინმე ადვოკატი დავითი იმყოფებოდა, რომელიც დაახლოებით ნახევარი საათის განმავლობაში არწმუნებდა, რომ ეღიარებინა ის დანაშაული, რომელიც არ ჩაუდენია და სხვებისთვის დაედო ხელი".

"ჩემთან 7 თებერვალს შემოსული იყო ვინმე დავითი, გამეცნო როგორც ადვოკატი, რომელიც არ იყო ჩემი ოჯახის მიერ დაქირავებული ან შემოგზავნილი. დაახლოებით ნახევარი საათის განმავლობაში მარწმუნებდა, რომ მეღიარებინა ის დანაშაული, რომელიც არ ჩამიდენია და სხვებისთვის დამედო ხელი. რა თქმა უნდა მან ჩემი დარწმუნება ვერ შეძლო ასეთი არაკაცური საქციელის ჩადენის და ტყუილად დანაშაულის საკუთარ თავზე დაბრალების, როცა მსგავსი არაფერი ჩამიდენია. არ ვიცი, რა მოტივი ჰქონდა ამ ადამიანს, ან რა განზრახვა ამოძრავებდა," — აღნიშნულია ნიკოლოზ ჯავახიშვილის წერილში.

ნიკოლოზ ჯავახიშვილს პროკურატურა ჯგუფურ ძალადობაში მონაწილეობას ედავება, რისთვისაც მას 4-დან 6 წლამდე ვადით თავისუფლების აღკვეთა ემუქრება. ის მზია ამაღლობელის სოლიდარობის ნიშნად, მე-7 დღეა შიმშილობს.