ამერიკის შეერთებული შტატების საელჩო საქართველოში ქართული ოცნების ერთ-ერთი ლიდერის მამუკა მდინარაძის დღევანდელ განცხადებას ეხმაურება.

მამუკა მდინარაძის თქმით, საქართველოში მიმდინარე საპროტესტო აქციები საელჩოსგან დამოუკიდებლად არ წარმოებს და "მათი მოქმედება აბსოლუტურად აცდენილია ახლად არჩეული ხელისუფლების განცხადებებს"

აღნიშნულის საპასუხოდ აშშ-ის საელჩომ სოციალურ ქსელში განცხადება გაავრცელა:

"ბატონი მდინარაძის დღევანდელი განცხადებები სრულიად მცდარია და წარმოაჩენს ცოდნის ნაკლებობას იმის შესახებ, თუ რას აკეთებს შეერთებული შტატების საელჩო პრეზიდენტ ტრამპისა და სახელმწიფო მდივან რუბიოს მთავარი პრიორიტეტების მხარდასაჭერად —გახდეს ამერიკა უფრო უსაფრთხო, უფრო ძლიერი და უფრო წარმატებული"

მამუკა მდინარაძის განცხადებას, აშშ-ის საელჩოსთან დაკავშირებით, უცვლელად გთავაზობთ:

"მთელი პასუხისმგებლობით ვამბობ, თუ ამ ქვეყანაში ერთი ადამიანი არის, რომელიც ფიქრობს, რომ ქუჩის აქციები, ის პიარკამპანიები, ის მავნებლობები, რაც წარმოებს აგენტურული ოპოზიციის მიერ, ამ აგენტურის პატრონების ან საქართველოში აშშ-ის საელჩოსგან აბსოლუტურად დამოუკიდებლად და დისტანცირებით, მას წარმოდგენა არ აქვს რა ხდება დღეს საქართველოში, არც ერთ დეტალზე, არც გლობალურად და არც ვიწრო თემებთან მიმართებით. დიდი ბოდიში ყველასთან, ვისაც ასე სჯერა.
სამწუხაროა, რომ ამერიკის შეერთებული შტატების ახლად არჩეული ხელისუფლების განცხადებები, ნარატივები ერთია და მისი ქვედა რგოლების, მათ შორის, საქართველოში ამერიკის საელჩოს მოქმედება აბსოლუტურად აცდენილია იმ განცხადებებს, რასაც ვისმენთ. იმედია, ეს ძალიან მალე გასწორდება. ბუნებრივია, შტატები არ არის პატარა ქვეყანა, პატარა ბიუროკრატია არ არის შტატებში, რომ ასე მარტივად შეიძლებოდეს "დიფ სთეითის" დამარცხება და მისი გავლენების, სხვა დაბალ რგოლებშიც ეს პრობლემები იქნება, დარწმუნებული ვარ, მაგრამ ჩვენ ჩვენი გვაწუხებს უფრო, ვიდრე სხვა დანარჩენი..." — განაცხადა მდინარაძემ დღევანდელ ბრიფინგზე ჟურნალისტებთან საუბრისას.