ახალი თეატრის მანიფესტი ბათუმში ჩავიდა. ეს მათი რეგიონებში გასვლის პირველი დღეა. ევროპის მოედანზე მიმდინარე საპროტესტო ღონისძიებაზე სიტყვით გამოსვლისას, ახალი თეატრის სამხატვრო ხელმძღვანელმა, დავით დოიაშვილმა თქვა, რომ მათი ბათუმში ჩასვლის მიზანი ის იყო, მათი, ბათუმელების ხმა და ტკივილი გაეგო.

"ბათუმში ჩამოვედით, რომ გავიგოთ თქვენი ხმა, გავიგოთ ის ტკივილები, რაც თქვენ გაქვთ... მთავარია, დავინახოთ და მოვუსმინოთ ერთმანეთს. ერთად უფრო ადვილად გადავცურავთ ზღვას. …ამ ადამიანებს აღარაფრის იმედი აღარ აქვთ, ყველანაირი იმედი ამოეწურათ. გპირდებით, როცა იმედი გკარგავთ, თეატრი მოდის და გისმენთ," — თქვა დავით დოიაშვილმა ბათუმში ახალი თეატრის მანიფესტზე სიტყვით გამოსვლისას

შეკრებილებს მიმართეს პოლიტპატიმრების — ზვიად ცეცხლაძის მამამ, ზურაბ ცეცხლაძემ და ანდრო ჭიჭინაძის დედამ, ლიკა გუნცაძემ მიმართეს.

სიტყვით გამოსვლისას ლიკა გუნცაძემ მადლობა გადაუხადა შეკრებილებს სოლიდარობისა და მხარდაჭერისთვის.

"ბათუმი არის ქალაქი-დღესასწაული ყოველთვის ჩემს გულშია. ეს არის ქალაქი, რომელმაც პირველმა დაიწყო წინააღმდეგობა. ძალიან დიდი მადლობა ამისთვის. ეს არის ზვიად ცეცხლაძის ქალაქი, გმირის, რომელიც ახლა დატყვევებული ჰყავს სისტემას. მადლობა ყველაფრისთვის — სოლიდარობისთვის, სიყვარულისთვის. ჩვენ გავიმარჯვებთ, ჩვენ გადავცურავთ ზღვას, ეს ქვეყანა ჩვენია", — თქვა ლიკა გუნცაძემ.

ახალმა თეატრმა საპროტესტო მანიფესტი თბილისში, ახალი თეატრის წინ მოწყობილ სცენაზე 23 იანვარს წარმოადგინა, სადაც მსახიობებმა ქვეყანაში მიმდინარე მოვლენები გააპროტესტეს და უკანონოდ დაკავებულების, მათ შორის ახალი თეატრის მსახიობის, ანდრო ჭიჭინაძის გათავისუფლება მოითხოვეს. იმავე დღეს დააანონსა დათო დოიაშვილმა რეგიონებში გასვლა.

თბილისს გარეთ პირველი გასვლა 1-ელ თებერვალს ბათუმში დაიგეგმა, მეორე — 2 იანვარს სამეგრელოში.