ვასო აბაშიძის სახელობის ახალი თეატრი რეგიონებში საპროტესტო მსვლელობას იწყებს. თეატრის ინფორმაციით, დასის მსვლელობა 1-ლ თებერვალს, დილის 9 საათზე გეზს თეატრის შენობიდან აჭარისკენ აიღებს.

დასის პირველი მანიფესტი 1-ლ თებერვალს, ბათუმში, 18:00-ზე ჩატარდება, შემდეგი შეხვედრა ადგილობრივ მოსახლეობასთან კი ზუგდიდში, 2 თებერვალსაა ჩანიშნული. ქალაქებში დაგეგმილი მანიფესტების ჩატარების ზუსტი ლოკაციის შესახებ ინფორმაცია თეატრის ფეისბუქ გვერდზე განთავსდება.

თეატრის მოთხოვნა პროტესტის პირველივე დღიდან უცვლელია — ისინი, როგორც დანარჩენი დემონსტრანტები, ითხოვენ ხელახალ, სამართლიან არჩევნებსა და რეჟიმის ტყვეების გათავისუფლებას. ცნობისთვის, რეჟიმის ერთ-ერთი სინდისის პატიმარი ანდრო ჭიჭინაძეა, აბაშიძის თეატრის დასის მსახიობი.

რამდენიმე კვირის წინ აბაშიძის თეატრმა, დავით დოიაშვილის ხელმძღვანელობით, ივანიშვილის რეჟიმს პატიმრების გათავისუფლება მოსთხოვა და ულტიმატუმის ბოლო ვადად 20 იანვარი დაასახელა. "ქართულმა ოცნებამ" თეატრისა და ხალხის მოთხოვნა არ დააკმაყოფილა და აქციებზე დაკავებული ადამიანები პატიმრობაში დატოვა, რის შემდეგაც მსახიობებმა და რეჟისორებმა თბილისში მანიფესტი წაიკითხეს და მოსახლეობას რეგიონებში გასვლის გეგმა წარუდგინეს.