პენიტენციურმა სამსახურმა ბათუმელებისა და ნეტგაზეთის დამფუძნებელი მზია ამაღლობელის ჯანმრთელობის მდგომარეობის შესახებ პირველი კომენტარი გააკეთა.

სპეციალური პენიტენციური სამსახურის სამედიცინო დეპარტამენტის უფროსმა, მალხაზ ურთქმელიძემ განაცხადა, რომ მზია ამაღლობელის სიცოცხლეს საფრთხე არ ემუქრება.

"ბრალდებულის ჯანმრთელობაზე ზედამხედველობა მიმდინარეობს პენიტენციურ სისტემაში დამტკიცებული მოშიმშილე ბრალდებულის/ მსჯავრდებულის მართვის პროტოკოლის შესაბამისად, რაც გულისხმობს სასიცოცხლო მაჩვენებლების ყოველდღიურ მონიტორინგს, დინამიკაში ლაბორატიული კვლევების ჩატარებას და საჭირო სპეციალისტების კონსულტაციებს.

28 იანვარს ჩაუტარდა ე.წ. გაფართოებული ლაბორატური კვლევა. ამ ეტაპზე მიღებული ნაწილი კვლევების მონაცემები ნორმის ფარგლებში. ხვალ ჩატარდება კიდევ სხვა კვლევები. დაგეგმილია ინსტრუმენტული კვლევებიც.

ამჟამად მზია ამაღლობელის ჯანმრთელობის მდგომარეობა დამაკმაყოფილებელი და სტაბილურია…

…ბრალდებულ მზია ამაღლობელის სიცოცხლე საფრთხეში არ არის და მომავალშიც გაგრძელდება მის სიცოცხლესა და ჯანმრთელობაზე ზრუნვა ყველა საჭირო სამედიცინო მომსახურების გაწევით", — ამბობს ურთქმელიძე.

შეგახსენებთ, რომ მზია ამაღლობელი ბათუმში მიმდინარე უწყვეტ პროევროპულ აქციაზე დააკავეს — მას ბრალად პოლიციელზე თავდასხმა ედება და 4-დან 7 წლამდე პატიმრობა ემუქრება.

პროტესტის ნიშნად, მზია ამაღლობელი მე-18 დღეა შიმშილობს.