საქართველოს ახალგაზრდა იურისტთა ასოციაციის თავმჯდომარე ნონა ქურდოვანიძემ აღნიშნა, რომ ქართველი იურისტები, ევროსაბჭოს საპარლამენტო ასამბლეის ფარგლებში სტრასბურგში გამართულ შეხვედრაზე შესაბამის პირებს ქვეყანაში მიმდინარე ადამიანის უფლებების სისტემურ დარღვევაზე, წამების პრაქტიკაზე და პოლიტიკურ მართლმსაჯულებაზე არსებულ დეტალებს აცნობენ.

"სისხლის სამართლის ბრალდება და აღკვეთის ღონისძიების სახით პატიმრობის შეფარდება არის სრულიად უკანონო, ეს არის პოლიტიკური მართლმსაჯულება და ჩვენ ახლა სტრასბურგში სწორედ ამ საკითხზე ვსაუბრობთ და მზია ამაღლობელის საქმე არის ერთ-ერთი, რომელსაც ყველა შეხვედრაზე განვიხილავთ და ეს არის ჩვენი ვიზიტის მთავარი სათქმელი. ჩვენი მიზანია, რომ ვილაპარაკოთ იმ პოლიტიკურ დევნაზე და ანგარიშსწორებაზე, რასაც ადგილი აქვს საქართველოში, ადამიანის უფლებების სისტემურ დარღვევაზე, წამების პრაქტიკაზე და პოლიტიკურ მართლმსაჯულებაზე", — თქვა ქურდოვანიძემ TV პირველის ეთერში.

"ბათუმელების" და "ნეტგაზეთის" დამფუძნებელი და დირექტორი, მზია ამაღლობელი 11-12 იანვარს ორჯერ დააკავეს. პირველად სტიკერის გაკვრისთვის, რომელსაც ეწერა: "იფიცება საქართველო 15 იანვარს 15:00 საათზე". მანამდე ამავე საბაბით აქციაზე დააკავეს კიდევ 9 ადამიანი. რამდენიმე საათში დაკავებულთაგან ოთხი — მზია ამაღლობელი, თეონა ბერიძე, ციალა ქათამიძე და ნანა შავაძე გაათავისუფლეს. მალევე აჭარის პოლიციის მთავარ სამმართველოსთან მოულოდნელად ჩოჩქოლი ატყდა და მზია ამაღლობელი მეორედაც დააკავეს ორ სხვა პირთან ერთად.

მას ბრალი სისხლის სამართლის კოდექსის 353-ე პრიმა მუხლის პირველი ნაწილით წარუდგინეს, რაც პოლიციელზე თავდასხმას გულისხმობს. მუხლი 4-დან 7 წლამდე პატიმრობას ითვალისწინებს.