სომხეთის პრემიერმინისტრმა, ნიკოლ ფაშინიანმა, სომხეთის მიერ მოპოვებულ "დაზვერვის ინფორმაციაზე" დაყრდნობით, აზერბაიჯანი საპატიმროებში მყოფი მთიანყარაბაღელი ყოფილი ჩინოვნიკებისთვის "აკრძალული ფსიქოაქტიური მეთოდების" გამოყენებაში დაადანაშაულა.

ფაშინიანმა ეს განცხადება შაბათს, სომხეთის საზოგადოებრივ მაუწყებელთან ინტერვიუში გააკეთა.

მას სთხოვეს კომენტარი გაეკეთებინა ოპოზიციის ბრალდებებზე იმის შესახებ, რომ მთავრობა საკმარისს არ აკეთებდა აზერბაიჯანში დაკავებულების გათავისუფლებისთვის, რადგან ისინი მისი პოლიტიკური ოპონენტები იყვნენ. ფაშინიანმა ამის საპასუხოდ განაცხადა, რომ ის მათ პოლიტიკურ ოპონენტებად არ თვლის.

"უფრო მეტიც, ჩვენ ვაცნობიერებთ, რომ მომხდარი იწვევს არა მხოლოდ სერიოზულ შეშფოთებას, არამედ გამოყენებული იქნება რეგიონში ახალი ესკალაციების პროვოცირებისთვის", — განაცხადა მან.

მისი თქმით, მთავრობა "ცდილობს ამ პრობლემის ყველა არსებული საშუალებით მოგვარებას", და დასძინა, რომ ამჟამად არსებობენ "ზესახელმწიფოები, რომლებსაც მოქალაქეები ასეთივე მდგომარეობაში ჰყავთ და წლების განმავლობაში მათ დაბრუნებას ვერ ახერხებენ".

ამის საპასუხოდ, აზერბაიჯანის საგარეო საქმეთა სამინისტრომ გაავრცელა განცხადება, სადაც ფაშინიანის ბრალდებებს ფსიქოტროპული ნივთიერებების გამოყენებასთან დაკავშირებით "სრულიად უსაფუძვლო და სასაცილო" უწოდა.

სამინისტრომ ხაზგასმით აღნიშნა, რომ "აზერბაიჯანში პატიმართა არასათანადო მოპყრობის შესახებ ბრალდებები დამოუკიდებლად იქნა გამოძიებული, მათ შორის წითელი ჯვრის საერთაშორისო კომიტეტის მიერ და აღმოჩნდა, რომ ეს არის ცრუ".

"ცხადია, სომხური მხარის ასეთი განცხადება მეტყველებს იმაზე, თუ რამდენად ნერვიულობს სომხეთის პოლიტიკური ისტებლიშმენტი ომის დანაშაულებში ბრალდებულთა წინააღმდეგ მიმდინარე სასამართლო პროცესზე, რომლებსაც ისინი ოდესღაც ღიად უჭერდნენ მხარს აზერბაიჯანის წინააღმდეგ აგრესიის აქტისა და პოლიტიკის შესანარჩუნებლად", – ნათქვამია განცხადებაში.

17 იანვარს სასამართლოში დაიწყო აზერბაიჯანში დაპატიმრებული მთიანი ყარაბაღის ყოფილი თანამდებობის პირებისა და სხვა წარმომადგენლების საქმეების განხილვა.

მათ ბრალად ედებათ 2548 დანაშაული, მათ შორის გენოციდი, მონობა, ადამიანების იძულებითი გაუჩინარება, წამება, ტერორიზმის დაფინანსება და დანაშაულებრივი გაერთიანების შექმნა.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ