"ბრალდებული ნ.კ. სრულად არის უზრუნველყოფილი საკვებითა და შესაბამისი ჰიგიენური ნორმებით", – ინფორმაციას სპეციალური პენიტენციური სამსახური ავრცელებს და მედიაში გავრცელებულ ინფორმაციას ეხმაურება იმის შესახებ, რომ საპატიმროში მყოფ ნიკა კაციას საკვებზე შეზღუდვები აქვს.

"სპეციალური პენიტენციური სამსახური ეხმიანება ცალკეული მიკერძოებული მედიასაშუალებებით გავრცელებულ დეზინფორმაციას, ბრალდებულ ნ.კ.-ს უფლებების თითქოს შეზღუდვის შესახებ.

გვსურს, საზოგადოებას განვუმარტოთ, რომ ბრალდებული ნ.კ. სრულად არის უზრუნველყოფილი საკვებითა და შესაბამისი ჰიგიენური ნორმებით.

შესაბამისად, მისი უფლებების ხელყოფაზე საუბარი არის სიცრუე და მიზნად ისახავს საზოგადოების შეცდომაში შეყვანასა და სამსახურის დისკრედიტაციას.

თითოეული ბრალდებულისა და მსჯავრდებულის უფლების განუხრელი დაცვა სპეციალური პენიტენციური სამსახურის მთავარი პრიორიტეტია.

მოვუწოდებთ დეზინფორმაციის გამავრცელებლებს, რომ თავი შეიკავონ გადაუმოწმებელი და ცრუ ინფორმაციის გავრცელებისგან", — ნათქვამია განცხადებაში.

23 იანვარს მთავარი არხის ეთერში დაკავებული საბა სხვიტარიძის დედამ, ლელა ახობაძემ თქვა, რომ ნიკა კაცია 3 დღის მშიერია და "საკვები როცა მიდის, მაინცდამაინც კაციაზე მთავრდება". მან ისიც თქვა, რომ ნიკა კაციას თანამესაკნე ჩაგრავს და მისთვის ჩარიცხულ თანხებს იყენებს.

24 იანვარს პენიტენციურ დაწესებულებაში პატიმრობაში მყოფი ნიკოლოზ კაცია სახალხო დამცველის აპარატის რწმუნებულმა მოინახულა.

სახალხო დამცველის აპარატის მიერ გავრცელებულ ინფორმაციაში ნათქვამია, რომ ბრალდებულმა პენიტენციურ დაწესებულებაში მისი უფლებების დარღვევის ფაქტებზე მიუთითა, რაზეც სახალხო დამცველმა შესაბამის სამართლებრივი რეაგირება მოახდინა. მოგვიანებით სახალხო დამცველის აპარატის წარმომადგენელი დაგვიკავშირდა და გვითხრა, რომ ჟურნალისტებმა არასწორად გაიგეს, "კაციას პრობლემები შეექმნა ერთ კონკრეტულ საკვებზე, რომელიც მას რამდენჯერმე არ დახვდა". აპარატში აცხადებენ, რომ საკითხს სწავლობენ და შესაბამისი რეაგირება ექნებათ.

ჟურნალისტი ნიკა კაცია 7 დეკემბერს დააკავეს. მას სისხლის სამართლის კოდექსის 260-ე მუხლის მე-6 ნაწილს ედავებიან, რაც დიდი ოდენობით ნარკოტიკული საშუალებების უკანანო შეძენა-შენახვას გულისხმობს. კაციას ბრალის დამტკიცების შემთხვევაში 8-დან 20-წლამდე ან უვადო პატიმრობა ემუქრება.