თანაინვესტირების ფონდის ყოფილი ხელმძღვანელი, გიორგი ბაჩიაშვილი აბსოლუტური პოლიტიკური ძალაუფლების მქონე პირისგან მის მიერ დაქვემდებარებული სისტემის ადამიანის წინააღმდეგ გამოყენებაზე საუბრობს და აღნიშნავს, რომ მის მიმართ პოლიტიკური მიზნით დევნა ხორციელდება. ამის შესახებ ბაჩიაშვილმა საქალაქო სასამართლოში ჟურნალისტებთან საუბრისას განაცხადა.

მისი თქმით, ქართული ოცნების საპატიო თავმჯდომარის, ბიძინა ივანიშვილის მიერ მისთვის გაგზავნილი წერილი "გამოძალვის მიზნით მუქარაა".

"როდესაც პოლიტიკური აბსოლუტური ძალაუფლების პირი იყენებს მის მიერ დაქვემდებარებულ სისტემას ადამიანის წინააღმდეგ, რომელიც მის პოლიტიკურ დავალებებს არ ასრულებს და ეწინააღმდეგება მის პოლიტიკურ დღის წესრიგს, ეს პოლიტიკური მიზნითა და ძალაუფლებით ადამიანის დევნაა.
დღეს არის მეორე დღე ივანიშვილის მიერ დადგმული სპექტაკლის, რომელშიც მონაწილეობენ ივანიშვილის წარმომადგენლები და მე. შესაბამისად, დავსვამთ ძალიან მნიშვნელოვან კითხვებს, რის შემდეგაც ყველა ადამიანი და დაინტერესებული პირი ახალ დეტალებს შეიტყობს ამ სპექტაკლის შესახებ.
როდესაც დამნაშავეებს გატაცებული ჰყავთ ადამიანი და ისინი აგზავნიან მორიგების წერილს, ეს გამოძალვაა. მე ვარ ყველანაირი კანონის გარეშე, ამ ქვეყანაში ჩაკეტილი, ყველაფერი დაყადაღებული მაქვს და სასჯელით მემუქრებიან, შესაბამისად, ეს არის ჩვეულებრივი გატაცება და მუქარა გამოძალვის მიზნით", — განაცხადა ბაჩიაშვილმა.

ინფორმაციისთვის, პროკურატურა გიორგი ბაჩიაშვილს 2017 წელს განხორციელებულ ქმედებას ედავება, კერძოდ, პროკურატურის ინფორმაციით, ბაჩიაშვილმა ინვესტორს ჩადებული ინვესტიციიდან მიღებული სრული მოგების სანაცვლოდ, მხოლოდ 536 900 აშშ დოლარი გადასცა, ხოლო დარჩენილი ინვესტორის კუთვნილი 8986 ოდენობის ბიტკოინი მართლსაწინააღმდეგოდ მიითვისა, რომლის ღირებულებაც მისი მართლსაწინააღმდეგოდ დაუფლების პერიოდში 39 215 820 აშშ დოლარს შეადგენდა.