დედამიწასთან ახლოს მდებარე დიდი ასტეროიდი ფლორენსი დღეს დედამიწას უსაფრთხოდ ჩაუფრენს 7 მილიონი კილომეტრის დაშორებით. ფლორენსი დედამიწასთან ახლოს მდებარე ასტეროიდებიდან ერთ-ერთი ყველაზე დიდია ზომით. ნასას სპიცერის კოსმოსური ტელესკოპისა და NEOWISE-ის გაზომვებით, მისი ზომა 4,4 კილომეტრია.

ნასაში აცხადებენ, რომ მრავალ ასტეროიდს ჩაუფრენია ფლორენსზე ახლოს, თუმცა, მათი ზომები ძალიან პატარა ყოფილა. ფლორენსი ყველაზე დიდი ასტეროიდი იქნება, რომელმაც დედამიწას ასე ახლო მანძილზე ჩაუფრინა მას შემდეგ, რაც ნასამ ასტეროიდებზე „ნადირობა“ დაიწყო.

ფოტო: NASA

ეს შედარებით ახლო ჩაფრენა მეცნიერებს საშუალებას მისცემს, ასტეროიდი უფრო დეტალურად შეისწავლონ. მათი მოლოდინით, ფლორენსი საუკეთესო სამიზნე ობიექტია მიწაზე მყოფი რადარული ობსერვატორიებისთვის. რადარული ფოტოების გადაღება კალიფორნიაში მდებარე ნასას Goldstone Solar System Radar-ითა და პუერტო რიკოს არესიბოს ობსერვატორიით იგეგმება. მიღებული რადარული სურათები ფლორენსის რეალურ ზომას გვიჩვენებს. ასევე ამ ტექნიკის დახმარებით, საშუალება გვექნება, ასტეროიდის დეტალებს დავაკვირდეთ 10 მეტრის მასშტაბით.