საბა მეფარიშვილის და ომარ ოკრიბელაშვილის ადვოკატები საქმეზე მუხლის კვალიფიკაციის შეცვლას ითხოვენ. ისინი 14 მაისს, პარლამენტის შესასვლელთა რკინის დამცავი ჯებირების დაზიანების ბრალდებით დააკავეს.

ოკრიბელაშვილის ადვოკატმა, დავით გამყრელიძემ სხდომის დაწყებამდე განმარტა, რომ ბრალდებულებს ბრალი ჯგუფურობიდან უბრალოდ ნივთის დაზიანებით უნდა გადაუკვალიფიცირდეთ.

როგორც გამყრელიძე ამბობს, ჯებირი, რომლის დაზიანებასაც დაკავებულებს ედავებიან, უკვე დაზიანებული იყო, თუმცა, ისინი არ უარყოფენ, რომ გარკვეული მოქმედება განახორციელეს.

ამასთან, დღევანდელ სხდომაზე დასკვნით სიტყვას დამსწრეებიც წარმოთქვამენ, რის მერეც სიტყვის საბოლოო უფლებით ისარგებლებენ ბრალდებულები, რის შემდეგაც მოსამართლე განაჩენის გამოსატანად სათათბიროდ გავა.

შეგახსენებთ, რომ 14 მაისს სამართალდამცავებმა დააკავეს 19 და 23 წლის ახალგაზრდები. ორივეს ბრალი წარდგენილი აქვს სისხლის სამართლის 187-ე მუხლის მე-2 ნაწილის "გ" ქვეპუნქტით, რაც გულისხმობს ნივთის ჯგუფურად დაზიანებას.

გამოძიების ინფორმაციით, ბრალდებულებმა სხვა პირებთან ერთად რკინის ნივთის და ფიზიკური ძალის გამოყენებით მიზანმიმართულად დააზიანეს პარლამენტის შესასვლელთან განთავსებული რკინის დამცავი ჯებირი.