თბილისის მერიის შშმ პირთა საკითხებზე მომუშავე საბჭოს აღმასრულებელი მდივანი, გიგა სოფრომაძე, რომელიც სამსახურიდან, სავარაუდოდ, პოლიტიკური ნიშნით გაათავისუფლეს, სოციალურ ქსელში წერს, რომ თითქმის 8-წლიანი მუშაობის შემდეგ თბილისის მერია დატოვა. ის მადლობას უხდის ყველას, ვისთანაც შშმ პირების პრობლემებისა და გადაჭრის გზებზე უთანამშრომლია. მადლობას უხდის ასევე მშობლებს, რომლებსაც, რისკების გაცნობიერების მიუხედავად, "ერთხელ არ უსაყვედურიათ მისთვის, როცა გულწრფელ პროტესტს გამოხატავდა".

გიგა სოფრომაძის მიერ გავრცელებულ ტექსტს სრულად გთავაზობთ:

"ეს დღეც დადგა, რომ თითქმის 8-წლიანი მუშაობის შემდეგ დავტოვე თბილისის მერია.

არ მინდა ეს ტექსტი ვრცელი და სხვადასხვა ამბების გახსენებით იყოს დატვირთული, ამიტომ ძირითად აქცენტს მადლობაზე გავაკეთებ.

ჩემი მუშაობის განმავლობაში თითქმის არ ყოფილა მერიის სამსახური, გამგეობა, სსიპ, ააიპ, შპს და ა.შ.. რომელთა ყველა რანგის თანამშრომელთანაც არ მქონია შეხება და რომლებთანაც არ მისაუბრია შშმ პირთა პრობლემებსა და გადაჭრის გზებზე...

თქვენი სამუშაოები უმნიშვნელოვანესია, თუმცა ყველა ვთანხმდებით, რომ მათში ბევრი ისეთი ხარვეზია, რომლის გამოსწორებაც საქმის სიყვარულს, გულისხმიერებასა და გონიერებას უფრო მოითხოვს, ვიდრე ფინანსურ რესურსს...

მადლობა თქვენ, ყველა ღიმილიანი გამარჯობისა და ნახვამდისთვის. თქვენთან მუშაობა და მეგობრობა დიდი გამოცდილება და ფასეულობაა ჩემთვის, რასაც არასოდეს დავივიწყებ...

აქვე არ შემიძლია მადლობა არ ვუთხრა ჩემს მშობლებს, რომლებიც ხედავდნენ ყველა იმ რიკს, რაც ჩემს გულწრფელ პროტესტსა და საკუთარი და მეგობრების ღირსების დაცვას უკავშირდებოდა...

მიუხედავად იმისა, რომ 29-ე წელია ქირით ვცხოვრობთ, მიუხედავად იმისა, რომ ჩემი ხელფასი ორივე მათგანის ერთად აღებულ ხელფასზე მეტი იყო, მიუხედავად იმისა რომ ორივე მათგანის ჯანმრთელობის მდგომარეობა მკვეთრად გაუარესებულია, ერთხელ არ უთქვამთ რომ გავჩერებულიყავი, ერთხელ არ უთქვამთ რომ ეშინოდათ, მიუხედავად იმისა, რომ ეს მაინც ეტყობოდათ... მათგან სულ მესმის, რომ ღირსება და ნათქვამი სიტყვის ფასი უმთავრესია.

მადლობა ჩემს მასწავლებლებს და განსაკუთრებით დამრიგებელს, რომელმაც პირველმა დამანახა აზრის, სიტყვისა და კალმის ძალა... არ მავიწყდება ის ღონისძიება და ჩემთვის მოცემული სიტყვა, რომელიც ილია ჭავჭავაძის მკვლელობას მივუძღვენით... არ მავიწყდება იმ ადამიანების ბიოგრაფიები, რომლებიც მხოლოდ იმიტომ დახოცეს, რომ განვითარებული და ჭეშმარიტად ღირსეული საქართველო უნდოდათ...

ჩემი ამბის გახმაურების შემდეგ რამდენიმე ადამიანმა მითხრა, ხომ იცოდი რომ ასე იქნებოდაო?! კი, ვიცოდი, და?

მათაც იცოდნენ რომ დახვრეტდნენ, ან გადაასახლებდნენ, მაგრამ დღეს, მხოლოდ დახვრეტილების უკვდავ ღირსებას ვუყურებთ და ვადიდებთ და თითქმის არაფერი ვიცით შემსრულებლების ლაქებიან სიცოცხლეზე...

ბოლო დღეებში რამდენიმე ადამიანი რომ შემხვდით და თვალს ვერ მისწორებდით, აღარაფერს ვამბობ გამარჯობის ვერთქმაზე, დაფიქრდით, რატომ ხდება ასე? ან ასეთი ცხოვრება გინდოდათ საკუთარი თავისთვის?

არ ინერვიულოთ, დახვეტა და გადასახლება აკრძალულია, ამიტომ კიდევ ბევრჯერ შევხვდებით, ისევ ისე, ღიმილით მოგესალმებით და გულწრფელად გკითხავთ, როგორ ხართ?!

ყოველთვის მიგულეთ თქვენი ადამიანობისა და ღირსების გვერდით.

ჩვენ ერთად ვიცხოვრებთ განათლებულ, განვითარებულ, ძლიერ და ევროპულ საქართველოში", — წერს გიგა სოფრომაძე.

შშმ პირთა საკითხებზე მომუშავე საბჭოს აღმასრულებელი მდივანი, გიგა სოფრომაძე სამსახურიდან, სავარაუდოდ, პოლიტიკური ნიშნით, 25 დეკემბერს გაათავისუფლეს. 27 დეკემბერს ქალაქის მერმა, კახა კალაძემ თქვა, რომ მერიიდან პოლიტიკური ნიშნით არავინ გაუთავისუფლებიათ.

31 დეკემბერს მან სოციალურ ქსელში საქართველოს უსინათლო კავშირის თავმჯდომარის მოვალეობის შემსრულებლის, კონსტანტინე ჟღენტის "დასმენის წერილს" გამოაქვეყნა, რომელიც მან კახა კალაძის სახელზე დაწერა და რომლის საფუძველზეც მისი სამსახურიდან დათხოვნა მოხდა.

ამავე თემაზე: