1936 წელს ხევსურებმა წერილი მისწერეს ამერიკის მთავრობას. ისინი ამერიკის ძლიერ და დემოკრატიულ სახელმწიფოს სთხოვდნენ რუსეთის წინააღმდეგ ბრძოლაში დახმარებას.

წერილზე ხელმომწერები: ღერენა, გიგა და გიორგი ლიქოკელები, თანამოაზრე სხვა ხევსურებთან ერთად შეიპყრეს და უკვალოდ გაქრნენ... წერილი კი მათი ყველაზე ნათელი კვალია!

დღეს, როდესაც ისევ რუსეთი უქმნის ჩვენს ქვეყანას ეგზისტენციალურ საფრთხეს, როდესაც ისევ ამერიკა არის ჩვენი ბრძოლის იმედი, მივწეროთ წერილი ამერიკის შეერთებული შტატების მთავრობას, ასე გავაცოცხლოთ ხევსურების წერილიცა და მათი მიზანიც!, — ამის შესახებ ღონისძიება "გავაცოცხლოთ ხევსურული წერილი!" ორგანიზატორები წერენ, რომელიც დღეს, 30 დეკემბერს, 19:00 საათზე, პირველ კლასიკურ გიმნაზიასთან გაიმართება.

აქვე გიზიარებთ 2024 წლის დეკემბერში შექმნილი წერილის ტექსტს:

ამერიკის მთავრობას

საქართველო, თბილისი... დეკემბერი, 2024 წელი.

"ამერიკას გთხოვთ დიდის თხოვნით ძრიელის სახელმწიფო ხართ და

მოგვეშველენით და დახმარება გაგვიწივეთ თორე ცოდო ვართ. იმედი გვაქვს რო მოგვეშველებით თუ გვიშველით თქვენ თუ არა ჩვენი მეშველი აღარა არი".

ეს არის სიტყვები წერილიდან, რომლითაც თითქმის ასი წლის წინ ბოლშევიკური რუსეთის მიერ შევიწროებულმა ქართველებმა მიმართეს ამერიკის ხელისუფლებას. სამწუხაროდ, მაშინ ამ მიმართვამ ადრესატამდე ვერ მიაღწია.

ბოლშევიკურმა რეჟიმმა მრავალი წლით გააუქმა საქართველოს დამოუკიდებლობა, მოგვიტანა უდიდესი ადამიანური მსხვერპლი, ჩვენი რელიგიის და ტრადიციების, ჩვენი კულტურული მემკვიდრეობის ნგრევა და შეურაცხყოფა და ბევრი წლით შეაფერხა ჩვენი ქვეყნის განვითარება.

დღეს, ქართველი ხალხის მიერ სისხლითა და მსხვერპლით მოპოვებულ დამოუკიდებლობას ისევ დაცვა ჭირდება! და დღეს, ჩვენ ისევ მოგმართავთ თქვენ - ჩვენი პლანეტის ძლევამოსილი, დემოკრატიული სახელმწიფოს მთავრობას! დაგვეხმარეთ, რომ ჩვენს ქვეყანაშიც იზეიმოს დემოკრატიამ! დაგვეხმარეთ, რომ მშვიდობისმოყვარე, ნიჭიერ, მშრომელ საქართველოს მოსახლეობას საშუალება მიეცეს, დემოკრატიული გზით ირჩევდეს საკუთარ ხელისუფლებას, ვითარდებოდეს საკუთარი ტრადიციებისა და ფასეულობების, პროგრესის, მსოფლიოში მშვიდობისათვის ხელშეწყობის გზით!

დღეს ამ მოთხოვნებით ჩვენ ქუჩაში, მიტინგზე ვდგავართ და გვაქვს იმედი, ამჯერად ჩვენი ხმა მოაღწევს თქვენამდე და პასუხი არ დააყოვნებს!

ღმერთმა დალოცოს საქართველო!

ღმერთმა დალოცოს ამერიკა!

მშვიდობა საქართველოს!

მშვიდობა მსოფლიოს!

საქართველოს მოქალაქეები", — წერენ აქციის ორგანიზატორები.