საზოგადოებრივი მაუწყებლის კონკურსში გამარჯვებული გადაცემა Modem/Art ეთერში არ გავა. გადაცემის ავტორს, თეონა ჯორბენაძის თქმით, მან ამის შესახებ 24 აგვისტოს შეიტყო. ამის შესახებ ფეისბუკზე დაწერა:

"არხის მმართველმა გუნდმა კონკურსში გამარჯვებული ავტორები დაგვიბარა შეხვედრაზე, სადაც ყველაზე მთავარი იყო ის, რომ სამოქმედო გეგმა გაგვიზიარეს. ვასილ მაღლაფერიძემ ხელი ჩამოგვართვა, მოგვილოცა გამარჯვება და ბრძანა, რომ კონტრაქტები ჩვენთან და ჩვენს გუნდთან გაფორმდებოდა 1 სექტემბრიდან, ხოლო განახლებული ეთერი დაიწყებოდა 1 იანვარს".

ჯორბენაძის თქმით, ის ესაუბრა საზოგადოებრივი მაუწყებლის გენერალურ დირექტორს, ვასილ მაღლაფერიძეს, ჩატარდა რამდენიმე სამუშაო შეხვედრა და ამის შემდეგ ის კულტურის ბლოკის ხელმძღვანელს პაატა ქურდაძეს შეხვდა.

მისივე თქმით, პაატა ქურდაძე გადაცემის შინაარსისა და ფორმატის შეცვლაზე ესაუბრებოდა, რაცModem/Art-ის პროდიუსერს გაუკვირდა. ჯორბენაძის თქმით, პაატა ქურდაძე გადაწყვეტილებას ერთპიროვნულად იღებდა. ამის შემდეგ ისინი კიდევ ერთხელ შეხვდნენ ერთმანეთს, სადაც ტექნიკური საკითხები გაიარეს და შემდეგი შეხვედრაც დათქვეს.

თეონა ჯორბენაძის თქმით, 24 აგვისტოს საზოგადოებრივი მაუწყებლის სახელით მიიღო ოფიციალური მეილი, სადაც წერია, რომ პროექტი Modem/Art გამარჯვებულთა სიაში არ ყოფილა. წერილში ნათქვამია, რომ განხილვის შედეგად აღმასრულებელმა საბჭომ რეკომენდაცია არ მისცა Modem/Art-ს, ამიტომაც ეს პროექტი ეთერში არ გავიდოდა.

საზოგადოებრივი მაუწყებლის ვებგვერდზე არის საუკეთესო პროექტების სია და მათ შორის არის Modem/Art. ასევე, არხის ეთერით გავიდა რამდენიმე სიუჟეტი, სადაც საუბარია გამარჯვებული პროექტების სამუშაო ჯგუფებთან შეხვედრასა და ახალი სეზონისთვის მზადებაზე.

On.ge საზოგადოებრივი მაუწყებლის გენერალურ დირექტორს, ვასილ მაღლაფერიძეს დაუკავშირდა, რომელმაც დაადასტურა გადაცემის ეთერში არ გასვლა და კულტურის ბლოკის ხელმძღვანელთან, პაატა ქურდაძესთან გადაგვამისამართა. პაატა ქურდაძემ გვითხრა, რომ სოციალურ ქსელში "ჭორაობაზე" კომენტარს არ გააკეთებს და ამასთან დაკავშირებით საზოგადოებრივი მაუწყებელი ოფიციალური განცხადების გაკეთებას გეგმავს.

საზოგადოებრივი მაუწყებლის ახალი სეზონისთვის გადაცემების შესარჩევად კონკურსი სამ აპრილს გამოცხადდა. 21 ივნისს საკონკურსო კომისიამ აღმასრულებელ საბჭოსთან საუკეთესო პროექტებს რეკომენდაცია გაუწია.

საზოგადოებრივი მაუწყებლის ინფორმაციით, კომისიამ, ასევე, გასცა რეკომენდაცია, რომ წარმოებაში ჩაშვების თაობაზე დადებითი გადაწყვეტილების მიღებამდე უნდა შექმნილიყო სამუშაო ჯგუფი, რომელიც დამატებით იმუშავებდა პროექტის ავტორებთან ერთად პროექტების რეალიზაციის ტექნიკურ შესაძლებლობებზე, ფორმატების დახვეწაზე, პროექტების ვიზუალურ მხარესა და დიზაინზე.