საზოგადოებრივი მაუწყებლის აჭარის ტელევიზიისა და რადიოს გადაცემა "ბუნების კანონის" წამყვანი ირაკლი მსხილაძე სოციალურ ქსელში წერს, რომ შესაძლოა მისი გადაცემა დაიხუროს, თუ ის ფორმატს არ შეცვლის.

მსხილაძე აღნიშნავს, რომ გადაწყვეტილებას წინ უძღოდა ერთ-ერთი ჩანაწერის მასთან შეუთანხმებლად იუთუბიდან და ტელევიზიის ვებგვერდიდან წაშლა, რის შემდეგაც გადაცემასთან დაკავშირებით, ადმინისტრაციის მხრიდან, კრიტიკული კითხვები გაჩნდა.

"პროდიუსერმა მაცნობა, რომ ტელევიზიის დირექტორმა გადაწყვიტა გადაცემა "ბუნების კანონი" დახუროს. განმიმარტეს, რომ გადაცემის "ფორმატი" 31 დეკემბრამდე უნდა შევცვალო, წინააღმდეგ შემთხვევაში გადაწყვეტილება არ შეიცვლება. ტელევიზიის მესვეურების მხრიდან, გადაცემის უვარგისობაზე საუბარი მას შემდეგ დაიწყო, რაც 27 თებერვალს, რამდენიმე დღით ადრე ეთერში გასული გადაცემა, იუთუბიდან და ტელევიზიის ვებ-გვერდიდან წაიშალა. ეპიზოდი; „როლერის ატრაქცია“ ბალდის კანიონის ბუნების ძეგლს ეხებოდა. უკვე მეორე წელია ბალდის მოსახლეობა, მაფიოზურ-ბანდიტურ თავდასხმებს იგერიებს და სოფლის ბუნებრივ გარემოს იცავს. ტელევიზიის შიდა მოკვლევას უნდა დაედგინა რა გახდა, ვებ-გვერდიდან ეპიზოდის წაშლის მიზეზი ? ჩემთვის, დღემდე უცნობია მოკვლევის შედეგი... ვწუხვარ, რომ ბუნების კანონის მეათე სეზონი შუაში წყდება, ის რაც მე მეძვირფასება, სხვას შესაძლოა პრობლემად მიაჩნდეს. განსაკუთრებული მადლობა "მოძრაობას ბალდის კანიონის შესანარჩუნებლად", მათმა გაუტეხელმა ბრძოლამ სისტემური პრობლემები, აჭარის ტელევიზიაშიც გამოავლინა" — წერს ირაკლი მსხილაძე სოციალურ ქსელში

გადაცემა "ბუნების კანონი" აქტიურად აშუქებს გარემოსთან დაკავშირებულ პრობლემებსა და საკითხებს, მხარს უჭერს მწვანე პოლიტიკას და კრიტიკული შინაარსით გამოირჩევა.

საზოგადოებრივ მაუწყებელთან თბილისსა და ბათუმში, ორ კვირაზე მეტია მოქალაქეები პროტესტის ნიშნად იკრიბებიან. მათი მოთხოვნაა საზოგადოებრივმა მაუწყებელმა გახსნას ეთერი საზოგადოების ყველა ჯგუფისთვის, იყოს ობიექტური და გამოხატოს საზოგადოების ინტერესები, ნაცვლად პარტიული [ქართული ოცნების] ინტერესებისა.

ბათუმში პროტესტს წინ უძღოდა, აჭარის ტელევიზიის დირექტორის ლადო ტატიშვილის გადაწყვეტილება, რამდენიმე გადაცემის შეჩერებასთან დაკავშირებით. გადაწყვეტილება მოქალაქეების აქტიურობის შემდეგ შეიცვალა და აღნიშნული გადაცემები მალევე დაუბრუნდნენ ეთერს.

საზოგადოებრივი მაუწყებლის პირველმა არხმა, 1-საათიანი ყოველდღიური საგანგებო ეთერი დაუთმო იმ პირებს, რომელთაც საინიციატივო ჯგუფი კონსენსუსის საფუძველზე შეარჩევენ.

პროტესტის ფონზე ახალი ამბების ბლოკის დირექტორობიდან გადადგა გიორგი გვიმრაძე.

მაუწყებელთან მოქალაქეების პროტესტი დღემდე გრძელდება.