მოსკოვში, რუსეთის ქიმიური და ბიოლოგიური დაცვის უფროსი, გენერალ-ლეიტენანტი იგორ კირილოვი და მისი თანაშემწე იგორ პ. აფეთქების შედეგად დაიღუპნენ.

წინასწარი ინფორმაციით გენერალი და მისი ასისტენტი საცხოვრებელი სახლიდან გამოდიოდნენ, როდესაც სადარბაზოსთან ახლოს მდგომ ელექტროსკუტერზე დამაგრებული თვითნაკეთი მოწყობილობა აფეთქდა.

კირილოვის ლიკვიდაციაზე პასუხისმგებლობა ამ ეტაპზე არავის აუღია. თუმცა უკრაინულ და რუსულ მედიაში წერენ, რომ ცოტა ხნით ადრე უკრაინის სახელმწიფო უსაფრთხოების სამსახურმა რუსი გენერალი სამხედრო დანაშაულებში ეჭვმიტანილად ცნო.

გენერალ-ლეიტენანტი აქტიურად ავრცელებდა დეზინფორმაციას ლუგარის ლაბორატორიის შესახებ. მისი განცხადებით, ღორის გრიპი ლუგარის ლაბორატორიაში შეიქმნა. კირილოვი ამტკიცებდა, რომ აშშ ლუგარის ლაბორატორიაში მუშაობს ახალ ვირუსზე, რომლის გადამტანები ღამურები არიან.